– Aınagúl, áńgimemizdi jýyrda ótken jarystan bastaıyqshy. Bul ózi qandaı týrnır? Álemniń qansha elinen komanda qatysty?
– Bul – jyl saıyn arnaıy maqsattaǵy bólinister arasynda uıymdastyrylatyn bedeldi jarys. Bıyl oǵan 48 elden 109 komanda qatysty. Sonyń ishinde 9 áıelder quramasy óner kórsetti. Bes kúnge sozylǵan jarysta bes túrli jattyǵýdan synǵa tústik. Onyń bári – ózimizdiń kúndelikti qyzmetimizge arnalǵan aıryqsha jattyǵýlar. Atap aıtqanda, ǵımarat ishin qylmyskerlerden tazartý, kepilge alynǵandardy qutqarý degen sekildi tapsyrmalardy oryndadyq.
– Sonyń biri úlken dońǵalaqty kóterý tapsyrmasy bolǵanyn dúıim el kórdi. Qazaq qyzdarynyń alyp dońǵalaqty qalaı kóterip alǵanyna qaıran qalyp, tamsanbaǵan adam joq. Bul jarystaǵy eń qıyn tapsyrma boldy ma?
– Iá, ras, eń qıyny osy boldy. Jalpy, bul jarysqa 6 aı daıyndaldyq. Onyń ishinde shydamdylyqty, kúsh-qýatty, jyldamdyqty arttyrý maqsatynda fızıkalyq daıyndyq pen atý, mergendik turǵysynan taktıkalyq daıyndyqqa basa kóńil aýdaryldy. Buǵan qosa komandanyń psıhologııalyq daıyndyǵy da nazardan tys qalǵan joq. О́ıtkeni mundaı týrnırde komandalyq rýh, ózara túsinistik te mańyzdy ról oınaıdy. Tııanaqty daıyndyqtyń, sondaı-aq úılesimdi komandalyq jumystyń arqasynda jarysta jeńiske jettik. Iá, dońǵalaqty kóterý kezinde azdap qınaldyq. Negizi ony tórt qyz kóterýimiz kerek edi. Alaıda jarysta ýaqytty únemdeý úshin bir qyz basqa tapsyrmany oryndaýǵa júgirip ketti de, dońǵalaqty úsheýmiz kóterdik. Ony da biz aldyn ala ábden pysyqtaǵan edik. Jalpy aıtqanda, jarys óte qarqyndy ári qyzyqty ótti.
– Jeńimpaz bolǵan kezdegi sezimińiz qandaı edi?
– Otanyńnyń atynan álemdik jarysqa shyǵyp, eldiń namysyn jyrtyp, birinshi oryn alýdyń áseri tym bólek eken. Osy bıikten kóriný jolynda qanshama ter tóktik deseńshi. Babymyz turǵysynan talapqa saı boldyq. Jarysta baǵymyz da qosa shaýyp, dittegen maqsatymyzǵa qol jetkizgenimizge qýanyshtymyn.
– О́zińiz týraly birer suraq qoısam. Qazir qandaı qyzmet atqarasyz? Ishki ister salasyna qashan keldińiz?
– Qazirgi qyzmetim – Ishki ister mınıstrligine qarasty Jedel qımyldaıtyn arnaıy jasaqtyń vzvod komandırimin. Bul jarysqa «Tomiris» komandasynyń kapıtany retinde ekinshi márte qatystym. Atalǵan salaǵa kelýime bala kúnimnen polısııa kıimine qyzyǵýshylyǵym, osyndaı oqaly kıim kısem degen armanym sebepshi boldy. Maǵan deıin otbasymda quqyq qorǵaý organdarynda jumys istegen eshkim joq. Reseıdiń Omby oblysynda dúnıege kelgenmin. Sol jaqta joǵary oqý ornyn bitirgennen keıin atajurtqa qonys aýdaryp, jumysqa turdym. Alǵashqy eńbek jolym IIM dıplomatııalyq ókildikterdi qorǵaıtyn polısııa polkinde bastaldy. 2019 jyly tuńǵysh ret áıelderdiń Jedel qımyldaıtyn arnaıy jasaǵy qurylǵan soń, birden osy jerge qyzmetke aýystym. Sodan beri osy salanyń ystyǵy men sýyǵyna tózip, eńbek etip jatyrmyn.
– Arnaıy jasaqta qyzmet etý áıel adamǵa qıyn emes pe?
– Aldyńa maqsat qoıa bilseń, qıyn emes. О́zimniń jumysymdy maqtan tutamyn. Bilik pen bilektiń kúshin talap etetin qyzmetimiz arqyly keıingi jastarǵa, sonyń ishinde balalarymyzǵa da úlgi bolamyz. Meniń de otbasym, balalarym bar. Olardy elimizdiń abyroıly, Otanyn qorǵaıtyn azamaty etip tárbıeleýime osy qyzmetimniń qosar úlesi zor.
– Siz sekildi quqyq qorǵaý organdaryna qyzmetke turǵysy keletin sińlilerińizge qandaı keńes berer edińiz?
– Sportpen shuǵyldaný kerek. Salamatty ómir saltyn ustanýǵa shaqyramyn. Atap aıtqanda, tamaqtaný jaǵyna, zııandy ádetterden aýlaq bolýǵa mán berý qajet. О́z-ózińizdi damytyp, qabiletińizge sene bilseńiz, alynbaıtyn asý joq.
– Sport demekshi, siz sportpen de shuǵyldanatynyńyzdy bilemiz. Astanada ótken
V Kóshpeliler oıyndaryna qatysyp, júldeli orynnan kórindińiz. Sol jaıynda aıtyp berseńiz.
– Iá, men Kóshpeliler oıyndarynda arqan tartýdan qyzdar quramasy sapynda boldym. Bul jarysqa da 8 aı boıy daıyndaldyq. Aldymen qalalyq, oblystyq jarystarda top jaryp, Kóshpeliler oıyndary qarsańynda respýblıkalyq týrnırdiń sońǵy kezeńinde jeńiske jettik. Al oıyndarda, ózderińiz bilesizder, fınalǵa deıin jetip, ókinishke qaraı, sońǵy tartysta Reseı quramasynan utylyp, kúmis medalǵa ıe boldyq. Qazirgi tańda arqan tartýdan jarystarǵa qatysyp júrgen joqpyn. Alaıda jattyǵý jasap turamyn.
– Áńgimeńizge rahmet.
Áńgimelesken –
Eskendir ZULQARNAI,
«Egemen Qazaqstan»
