Osy sýretter ishinde 1897 jyly túsirilgen «Aqmola oblysy. Eki qazaq» degen foto kózge jyly ushyrady. Sýrettegi jigitterdiń aǵaıyndylar ekeni birden baıqalyp tur. Ekeýi de ústine jaǵaly barqyt shapan kıgen, beline kúmisten soǵylǵan kise beldik baılaǵan. Shapanynyń jıegi de altyn tústes galýnmen kómkerilgen. Ekeýiniń de basynda – zerli taqııa. Aıaǵyna kıgen etigi de jaltyrap kózge birden túsedi. Soǵan qaraǵanda aýqatty otbasynan shyqqany anyq. Sonaý alystan kelgen fransýz zertteýshisi eki qazaq jigitin qatar otyrǵyzyp sýretke túsirse, bulardyń beker adam bolmaǵany ǵoı. Kim biledi, bálkim óz ýaqytynyń bedeldi adamdary shyǵar. Osyndaı oıdyń jeteginde júrgende tarıhı sýret degende jany qalmaıtyn atyraýlyq jýrnalıst Nurbergen Maqymmen áńgimelesip qaldyq. Ol Jozef de Baıdyń kitabyn paraqtap shyqqan eken, sol azamattyń kómegimen sýrettegi adamdardyń aty-jónin anyqtaýdyń tıegi aǵytyla ketti.
Jozef de Baı Reseıge jasaǵan arheologııa-etnografııalyq saparynan «Edilden Ertiske deıin» («Ot Volgı do Irtysha») degen fransýz tilindegi joljazba kitabyn shyǵarypty. Osy kitap 1898 jyly orys tiline aýdarylyp, Tobyldaǵy bir baspadan jeke jınaq retinde jaryq kóripti. Kitapty fransýz tilinen orysshaǵa Tobyl gımnazııasynyń oqytýshysy E.Madjı aýdarǵanyn da aıta keteıik. Jozef de Baı kitabynda Reseıdiń eýropalyq bólimi men Batys Sibirge qalaı barǵanynan bastap, qandaı óńirlerdi aralaǵanyn, qaı jerde qandaı jádigerdi kezdestirgenin táptishtep turyp jazǵan.
Jozeftiń tabany Tobylǵa tıgen soń, odan ári Ombyǵa barýdy oılastyrypty. Tobyldan «Saropoul» degen parohodqa minip, bes kún degende Ombyǵa ázer jetipti. Sóıtip, Aqmola oblysynyń vıse-gýbernatory Aleksandr Dmıtrıev-Mamontovpen birge tarantaspen qazaq aýyldaryn aralap, Aqmola oblysy qazaqtarynyń tynys-tirshiligimen tanysýǵa múmkindik alypty. Sol kezde aǵaıyndy Dúısen men Dúısenbi Janǵosqındermen júzdesip, ekeýin sýretke túsirgen. Ol kitabynda bylaı dep jazady: «Omby Tobyl gýbernııasy men qazaq dalasynyń shekarasynda ornalasqan. Dalanyń basty qalasy retinde Aqmolany atar edik, alaıda qatynas joldarynyń qolaısyzdyǵyna baılanysty general-gýbernator men gýbernator Ombyda turady. Ombyǵa tıesili jerler Tobyl gýbernııasynyń aýmaǵynda ornalasqan. Maǵan 5 myń bas maly jáne 40 kıiz úıi bar qazaq Dýısen Djanlaskınge barýym úshin sol jerlerden ótýime týra keldi. Bul qazaq órkenıetti boıyna sińirgen kisi eken. Buryn bolys qyzmetin atqarǵan jáne úlgili qyzmeti úshin ımperatorlyq úkimetten arnaıy syılyq retinde shapan alǵan». Fransýz zertteýshisiniń Dýısen Djanlaskın dep otyrǵany – sýrettegi jigitterdiń biri Dúısen Janǵosqın. Oıymyz aldamaǵan eken, fotodaǵy adam myńdaǵan maly bar baı ári bolys bolǵan qazaq bolyp shyqty.
Derekterde Dúısenniń 1892 jyly ótken Taıynshakól jármeńkesi kezinde 50-100 bas jylqy, 20-50 buqa jáne
100-150 qoı jetkizgeni aıtylǵan. Omby qalasynan jaryq kórgen «Kırgızskaıa stepnaıa gazeta» basylymynyń 1895 jylǵy №31 sanynda «Dala habarlary» aıdarynda «Qazaq dalasyndaǵy fransýz saıahatshylary» degen maqala jarııalanǵan. Osy maqalada: «Qazirgi ýaqytta Ombyda arheologııany zertteý maqsatynda Eýropany aralap júrgen taǵy bir saıahatshy baron de Baı qonaq bolyp jatyr. Ol buǵan deıin Italııa, Ispanııa, Portýgalııa, Aýstrııa, Shve-sııa, Majarstan jáne Danııany aralap, zertteý jumystaryn júrgizgennen keıin, Reseı arheologııasyn túgendeýge kirisken. О́tken jeksenbide baron de Baı Qorǵan ýeziniń qazaǵy Dúısen Janǵosqınnyń shańyraǵyna arnaıy baryp qaıtty. Qonaqjaı úı ıesi barondy jáne onymen birge júrgen adamdardy jyly qarsy alyp, qonaq etti», – dep jazylǵan. Sondaı-aq maqalada sheteldik saıahatshynyń qazaqtyń etnografııalyq buıymdaryna qyzyǵýshylyq tanytqany, balýandar kúresin, kúıshi-dombyrashylardyń ónerin tamashalaǵany jazylǵan. Osy gazettiń 1889 jylǵy №27 sanynda Omby qaıyrymdylyq qoǵamy músheligine qabyldanǵan qazaqtardyń tizimi berilgen. Osynda da Dúısen men Dúısenbi Janǵosqınderdiń aty atalyp, 6 rýbl kóleminde jarna tólep, qoǵamǵa múshe bolǵany aıtylǵan.
1889 jyly qaǵazǵa túsken «Vedomost o chısle kırgızskıh volosteı, aýlov ı kıbıtok v Akmolınskoı oblastı (na trehletıe 1887–1989 gg.)» degen qujatta Qorǵan bolysynyń basqarýshysy Dúısen Janǵosqın men kandıdaty Dúısenbi Janǵosqınnyń aty atalady. Sol sekildi «HIH–HH ǵasyrdyń basyndaǵy Qazaq dalasyn basqarý júıesindegi bolys ınstıtýty» atty qujattar monografııasynda Dúısen Janǵosqınnyń 1890 jyldary Aqmola oblysy Omby ýezine qarasty Qorǵan bolysyn basqarǵany jazylǵan. Sonymen qatar Ortalyq memlekettik arhıvte Dúısenniń bolys kezindegi qyzmettik móri de saqtalǵany kórsetilgen.
Nurbergen Maqymnyń aıtýynsha, Dúısenniń baýyry Dúısenbi de bolys saılanǵan eken. Dúısen 1881–1889 jyldary qatarynan úsh ret, al inisi Dúısenbi 1890–1893 jyldary bolys bolypty. Jozef de Baı aǵaıyndy qazaqtardy 1897 jyly sýretke túsirgende ekeýiniń de bılikten bosaǵan kezi edi. Odan ári bolystyqty Dúısenniń balasy Qusaıyn qolyna alǵan. Dúısenniń otyrǵan aýylyn jurt «Dúısen aýyly» atap ketken. Bul – shamamen qazirgi Ombydaǵy Belsendi qazaq aýylynyń mańy. Sonymen qatar «Akmolınskıe oblastnye vedomostı» gazetiniń 1908 jylǵy №24 sanynda Dúısenniń ıyǵyna ekinshi dárejeli qurmetti shapan jabylǵany aıtylsa, osy basylymnyń 1911 jylǵy №22 sanynda Petropavl ýezi Jamantuz bolysyna qarasty №6 aýyldyń halyq soty bolǵany jazylǵan.
Búginde aǵaly-inili Janǵosqınderdi eshkim bile bermeıdi. Alaıda olardyń beıneleri sonaý Parıjden kelgen fransýz saıahatshysynyń fotoqorynda máńgilikke saqtalyp qaldy.
