Stýdenttik shaq, albyrt mahabbat. Jataqhana bólmesindegi jigitterdiń taǵdyry bir kúnde alasapyran bolyp, óz súıgenderi úshin táýekeldiń qaıyǵyna minedi. Júrekterin ǵashyqtyq derti boılap, sezim tálkegine túsken jigitter súıiktilerin qaratý úshin qandaı amalǵa barady? Oqıǵaǵa jalǵan balger aralasyp, qyza túsedi.
Jalpy, Ertis-Baıan teatry – byltyr qara kúzde ǵana tusaýy kesilgen jas trýppa. Soǵan oraı óner ujymy qoldaýǵa, jyly sózge zárý ekeni aıdan anyq. Oblys ortalyǵynan ádeıilep saparlap barǵandaǵy maqsatymyz – jas akterlerdiń aıaq alysyn baıqap, teatrdyń ishki aýanyn zerdelep kórý edi. «Ǵashyqtar hıkaıasy» buǵan deıin elimizdiń talaı sahnasynda qoıylyp kelgen spektakl bolǵanymen, Ekibastuz tórinde sezim men oıdy teń terbetip, erekshe kórindi. Bastapqyda shymyldyqtyń ber jaǵynda bastalǵanda bul qalaı bola qoıar eken degen kúdik kókeıde turyp aldy. Shymyldyq túrilgen ýaqytta zaldaǵy dekorasııa jarq etip, kóńilderge qýanysh syılady. Shetinen urshyqsha ıirilgen, plastıkalyq epti ul-qyzdar. Plastıkalyq qımyldary sondaı jarasymdy, úılesimdi kórindi. Birinshi kýrs stýdenti Tursynbekti somdaıtyn Nurserik Ormoldaev or tekedeı orǵyp, denesin jylansha ıreleńdetkende sırktiń ártisterine uqsap ketedi eken. Bárinen buryn Dastan rólindegi Narıman Jaǵyparovtyń óneri kórermen kóńilinen shyqty. Ermekti somdaǵan Nurym Aljapparov, Rústem – Bekzat Tájıev, Aıym – Nuraı Qanatqyzy, Mádına – Darııa Sovetjanova, Qymbat – Ánel Tólegenova, Ǵanı dekan – Esirkep Erkebulannyń, Aımaýytov teatrynan arnaıy kelip, Aqmaqtany somdaǵan Bahargúl Qurbanovanyń sheberlikteri jınalǵan jurtty rıza etti. Sońǵy áýen shyrqalǵan sátte barlyq kórermen oryndarynan túregelip, uzaq ýaqyt qoshemet kórsetti.
«Jas akterler senimimdi tolyqtaı aqtady. Birinshi kúngi premerada oınaýǵa múmkindik bergenim durys sheshim eken. Teatr jańadan qurylyp jatqan soń belgili bir dárejede qıyndyq bolady. Rekvızıtterdi, dekorasııany ózderi jasaıdy. Deı turǵanmen barlyq máseleni ujym jetekshisi Talǵat Saǵyntaevpen birlesip sheshtik. Al akter Narıman Jaǵyparov bolashaǵynan úmit kúttiretin jastyń biri ekenin baıqatty», deıdi qoıylym rejısseri Ádilet Aqanov.
Ekibastuz qalasynyń ákimi Aıan Beısekın atap ótkendeı, óner ujymy aldaǵy ýaqytta osyndaı qarqynmen jumysyn jalǵastyratyn bolsa, olarǵa arnap jeke ǵımarat salynady. Qazirgi kúnniń ózinde qarjylyq jospar jasalyp qoıǵan. Al ázirshe teatr trýppasy «О́ner» mádenıet ortalyǵyn panalaıdy. Teatr jetekshisi Talǵat Saǵyntaev úlken uıymdastyrýshylyq jumys atqaryp, az ýaqyttyń ishinde teatrǵa qajet dúnıelerdiń barlyǵyn aldyrǵan. Alda josparlary kóp. M.Áýezov atyndaǵy Qazaq ulttyq drama teatrynyń tárbıesin kórgen tanymal akter oblys pen qala basshylyǵy aıaǵyn qaz-qaz basqan ujymǵa aıtarlyqtaı qoldaý jasap otyrǵanyn jetkizdi. Akterlerge ákimdiktiń kómegin paıdalanyp 5 birdeı páter alyp bergen, alatyn jalaqylary joǵary.
«Ujymymyzda 18 akter bar, kileń jastar. K.Baıseıitova atyndaǵy Qazaq ulttyq óner ýnıversıtetiniń jáne T.Júrgenov atyndaǵy óner akademııasynyń túlekteri. О́zim buǵan deıin eki jyldaı S.Seıfýllın atyndaǵy Qaraǵandy oblystyq akademııalyq qazaq teatrynda bas rejısser, elordadaǵy Jastar teatrynda bir jyl rejısser bolyp qyzmet atqardym. Úlken shaharlarda bilim alǵan jastardy Ekibastuzǵa alyp kelý ońaıǵa soqpady. Buǵan deıin «Qosh mahabbat» qoıylymyn úsh márte sahnalaǵanbyz, zalǵa kórermen lyq toldy. Qala jurtshylyǵynyń shynaıy qoldaýyn sezinip otyrmyz», deıdi teatr rejısseri Bıbiajar Dıqan.
Pavlodar oblysy,
Ekibastuz qalasy
