Jańa mektepter oqý oryndaryndaǵy oryn tapshylyǵy máselesin sheshýge, qoldanystaǵy mektepterge túsetin júktemeni azaıtýǵa jáne júzdegen myń balaǵa qolaıly bilim alý jaǵdaıyn qamtamasyz etýge múmkindik beredi.
Jobanyń iske qosylǵany týraly Qazaqstan Respýblıkasynyń Prezıdenti Kasym-Jomart Tokaev alǵash ret 2022 jyly «Ádiletti memleket. Birtutas ult. Berekeli qoǵam» atty Joldaýynda málimdegen bolatyn. Sol kezde Memleket basshysy orta bilim sapasy tabysty ult qalyptastyrýdyń mańyzdy faktory ekenin atap ótti.
Jobanyń negizgi mindeti – oqý oryndaryna suranys joǵary qalalar men qarqyndy damyp jatqan eldi mekenderde jańa formattaǵy mektepter salý. Barlyq mektepter zamanaýı jabdyqtarmen jáne negizinen otandyq óndiristiń jıhazdarymen qamtamasyz etilgen.
Qala men aýyl mektepteri arasyndaǵy alshaqtyqty azaıtýǵa erekshe kóńil bólindi. Jańa nysandardyń jartysyna jýyǵy aýyldyq jerlerde ornalasqan. Bul balalardyń turǵylyqty jerine qaramastan sapaly bilimge teń qol jetkizýine múmkindik beredi.
Jańa formattaǵy mektepter zamanaýı sáýletimen jáne tıimdi josparlanǵan ınfraqurylymymen erekshelenedi. Olardyń jalpy aýdany tıptik mektep ǵımarattarymen salystyrǵanda 15-20 paıyzǵa keń, al tehnıkalyq jabdyqtalý deńgeıi tórt ese joǵary. О́ńirlerdiń qajettiligine qaraı joba aıasynda 300-den 2500 orynǵa deıingi ártúrli syıymdylyqtaǵy mektepter salý qarastyrylǵan. Bul rette aýmaqtardyń klımattyq jáne ınfraqurylymdyq erekshelikteri eskerildi.
Jobanyń mańyzdy baǵyttarynyń biri – ınklıýzıvti bilim berýdi damytý. Erekshe bilim berý qajettilikteri bar balalar úshin arnaıy kabınetter men jeke sanıtarlyq bólmeler qarastyrylǵan. Ǵımarattarda lıftiler, pandýstar jáne navıgasııalyq kórsetkishter ornatylǵan, sondaı-aq psıholog, logoped jáne defektolog kabınetteri jumys isteıdi. Sonymen qatar mektep qurylysy tájirıbesinde alǵash ret ár blokta oqýshylar men pedagogterge arnalǵan demalys aımaqtary qarastyryldy.
Qaýipsizdik máselesine de erekshe nazar aýdaryldy. Mektepter zamanaýı beınebaqylaý júıelerimen jabdyqtalǵan, olardyń beınesi jedel basqarý ortalyqtaryna shyǵarylady. Sonymen qatar dabyl túımeleri, dybystyq habarlaý júıeleri, esikterdi avtomatty túrde buǵattaý júıesi jáne lısenzııalanǵan kúzet qyzmeti qarastyrylǵan.
Jańa formattaǵy mektepterdegi tárbıe jumysy «Adal azamat» tulǵany qalyptastyrý baǵdarlamasynyń qaǵıdattaryna negizdelgen. Bilim berý ortasy qoǵam damýyna úles qosýǵa daıyn, jaýapty, adal ári bastamashyl azamat tárbıeleýge baǵyttalǵan.
Osylaısha, «Keleshek mektepteri» ulttyq jobasy sońǵy jyldardaǵy bilim berý salasyndaǵy eń iri ınfraqurylymdyq bastamalardyń birine aınaldy. Jańa mektepter zamanaýı bilim berý ortasyn qalyptastyryp, eldiń adamı kapıtalyn damytýǵa berik negiz qalaıdy.
Aıta keteıik, buǵan deıin Aqtóbe qalasynyń Jańaqonys-2 turǵyn úı alabynda 600 oqýshyǵa laıyqtalǵan jańa mektep paıdalanýǵa berilgenin habarlaǵan edik.
