Tańerteńnen bastap turǵyndar belsendilik tanytyp, óz tańdaýlaryn jasap jatyr. Ýchaskelerde qaýipsizdik sharalary qatań saqtalǵan. Referendým komıssııasynyń músheleri daýys berý tártibin túsindirip jatyr.
Referendýmǵa óz tańdaýyn jasaýǵa kelgen elorda turǵyny Áshim Ábdirahmetov jańa Konstıtýsııa jobasymen tolyq tanysyp shyqqanyn aıtty.
«Men eldiń bolashaǵy úshin kóp eńbek sińirgen adammyn. Qazir 74 jasqa kelsem de el ómiri úshin mańyzdy sharalardan tys qalǵan emespin. Biz aǵa urpaq táýelsizdiktiń qadirin bir kisideı bilemiz. Qazirdiń ózinde dúnıejúzinde túrli soǵys órti tutanyp jatqanyn estip otyrmyz. Osyndaı kezde elimizdiń tynyshtyǵyna, turaqtylyǵyna shúkirshilik etemiz. Jastarymyzdyń bolashaǵy budan da jarqyn bolaryna senemin. Búgin referendýmǵa kelip azamattyq ustanymymdy bildirip, óz tańdaýymdy jasadym. Bul meniń ardager retinde el damýyna qosqan úlesim dep bilemin», deıdi ol.
Referendým ýchaskesine otbasymen kelip daýys berip jatqan azamattar da jeterlik. Sonyń biri Vıtalıı Izakovtyń otbasy.
Almatynyń Naýryzbaı aýdanyndaǵy referendým ýchaskesine batyrlar keldi
«Búgin referendýmǵa arnaıy kelip, óz daýysymdy berdim. Ár azamat eldiń bolashaǵyna beıjaı qaramaýy kerek dep oılaımyn. Sondyqtan osyndaı mańyzdy sheshim qabyldanatyn kezde halyqtyń pikirin bildirýi óte mańyzdy. Tańerteńnen bastap saılaý ýchaskesine kelip jatqan adamdardyń qarasy da kóp eken. Bul – turǵyndardyń belsendiligin kórsetedi. Men de óz azamattyq mindetimdi oryndap, tańdaýymdy jasadym. Jubaıymmen, eki ulymmen birge keldim. О́ıtkeni, balalarymnyń referendýmnyń mańyzyn sanasyna sińire bergenderin qaladym», deıdi otaǵasy Vıtalıı Izak.
Jalpy №316 referendým ýchaskesine 2603, al №317 referendým ýchaskesine 2680 saılaýshy tirkelgen. Daýys berý elimizdiń barlyq óńirlerinde tańǵy saǵat 07:00-den bastalyp, keshki 20:00-ge deıin jalǵasady.
