Sýret: prosports.kz
Jahandyq jarysqa Kanada quramasy 1963 jyldan beri úzdiksiz qatysyp keledi. Tek 1965 jyly ǵana olar básekede bolǵan joq. Sodan beri 194 kezdesý ótkizip, 111 ret jeńiske jetti. Ár jyldary shırek, jartylaı fınaldarda oınady. О́zderiniń eń zor tabysyna «Úıeńki japyraqtar eliniń» ókilderi 2023 jyly qol jetkizdi. Sevılıada ótken fınaldyq básekede Heıdı ál-Tabah jetekshilik etken ujym Italııany 2:0 esebimen utty. Juldyzdy komandanyń sapynda Ejenı Býshar, Gabrıela Dabrovskı, Rebekka Marıon, Ketrın Sebov, Marına Stakýshıch, Leıla Fernandes syndy sulýlar óner kórsetti.
Elimiz ben Kanada quramalarynyń Kıng kýbogi jolyndaǵy jarysta joldary bir márte qıysty. Osydan 10 jyl buryn qarsylastardyń kortynda ótken básekede qyzdarymyz 2:3 esebimen ese jibergen edi. Bul kúnderi álemdik reıtıngte Kanada tórtinshi orynǵa turaqtasa, elimiz quramasy toǵyzynshy satyǵa taban tirep tur.
Qazir Kanada óte qarýly. Eń úzdik tennısshisi Vıktorııa Mboko álemdik reıtıngte 13-oryndy ıelenip otyr. 19 jastaǵy asa daryndy oıynshy byltyr WTA-nyń Monreal men Gonkongtegi týrnırlerin utty. Úzdikter tiziminde 24-satyǵa jaıǵasqan Leıla Fernandestiń tabysy komandalyq áriptesinen de zor. Tegi ekvadorlyq tennısshi 2021 jyly AQSh-tyń ashyq birinshiligi (jekelegen syn) men 2023 jyly Rolan Garrostyń (juptyq syn) fınalynda kúsh synasty.
Elimiz ben Kanadadan bólek, osy kezeńde Italııa – Japonııa, Belgııa – AQSh, Aýstralııa – Ulybrıtanııa, Slovenııa – Ispanııa, Shveısarııa – Chehııa, Ýkraına – Polsha quramalary ózara sheberlik baıqasady. Fınaldyq kezeńdi qabyldaıtyn Qytaı tennısshileri irikteý týrnırine qatyspaı-aq, negizgi jarysqa birden joldama aldy.
