Foto: Aqorda
Prezıdent óz sózinde Halyq Konstıtýsııasy – strategııalyq senim mandaty jáne uzaqmerzimdi maqsattar men órleý jolyna bastaıtyn jańa qoǵamdyq kelisim ekenin atap ótti. Memleket basshysy elimiz damýdyń jańa kezeńine qadam basqanyn aıtyp, soǵan sáıkes, memleket pen azamattardyń yqpaldastyǵy qaıta jańǵyrýy qajet ekenin jetkizdi.
Prezıdent: Jańa Halyq Konstıtýsııasy – keler urpaqpen birge jasaı beretin qasıetti qujat
«О́zderińizge málim, byltyr qylmystyq jaýapkershilikke tartylǵandarǵa raqymshylyq jasaldy. Endi azamattar men memlekettiń qaýipsizdigine qater tóndirmeıtin birqatar qylmystyq jáne ákimshilik quqyqbuzýshylyq boıynsha taǵy da raqymshylyq jarııalaýǵa bolady. Elimizde ákimshilik ister boıynsha raqymshylyq alǵash ret jasalatynyn atap ótkim keledi. Parlament qazirgi sessııanyń sońyna deıin tıisti zań qabyldaýy kerek. Bul – Negizgi zańdaǵy adamgershilik ıdealdary men progressıvti qundylyqtardy qoǵamda ornyqtyratyn mańyzdy qadam. Jańa Konstıtýsııa – halqymyzdyń yntymaq-birliginiń jarqyn sımvoly. Onyń baptarynda árbir qazaqstandyqtyń armany men ańsary, urpaǵynyń baıandy bolashaǵyna degen úmiti men senimi kórinis tapqan. Ata zań barsha azamattyń – Otanymyzdyń shynaıy patrıottarynyń basty baǵdaryna aınalady. Qazaqstannyń jańa Konstıtýsııasy – álemdik órkenıettiń bıigine bet alǵan ultymyzdyń berik ári myzǵymyz tuǵyry. Meniń buǵan eshqandaı kúmánim joq. Sizderdiń de shúbálaryńyz bolmaıdy dep oılaımyn», dedi Qasym-Jomart Toqaev.
Memleket basshysy jańa Konstıtýsııany qabyldaý – ulttyń jańa sapasyn qalyptastyrý ekenin atap ótti.
«Bul – durys pen burysty tanı biletin, jaqsy men jamannyń ara-jigin ajyrata alatyn, kemeline jetken jurttyń ǵana qolynan keletin is. Jańa Konstıtýsııa eldigimizdiń tiregi, egemendigimizdiń tuǵyry bolady. Onyń ár normasy, ár tarmaǵy Táýelsizdigimizdi nyǵaıta túsedi. Ádildik qaǵıdaty bas qujattyń ózegine aınaldy. Sondyqtan jańa Ata zańdy Ádiletti Qazaqstannyń tólqujaty desek, qatelespeımiz. Men el Prezıdenti jáne Konstıtýsııa kepili retinde bas qujattaǵy erejelerdiń múltiksiz oryndalýy úshin bar kúsh-jigerimdi salamyn. Jańa Konstıtýsııamyzǵa sáıkes adal qyzmet etýge sert beremin. Elimiz árqashan ósip-órkendeı bersin! Qasıetti Otanymyz – Qazaqstan Respýblıkasy máńgi jasasyn!», dedi Prezıdent.
Prezıdent Konstıtýsııany qabyldaýǵa arnalǵan saltanatty jıynǵa qatysty
