Mádenı-sporttyq bastamanyń negizgi maqsaty – ulttyq qundylyqtardy dáripteý jáne jas býynnyń dástúrli sport túrlerine qyzyǵýshylyǵyn arttyrý boldy.
Jekpe-jek saraıynda ótken shara barysynda 3000-ǵa jýyq oqýshy «Altyn saqa» atty áserli fleshmobqa qatysty. Balalar arnaıy qoıylym arqyly asyqtyń «alshy» túsý beınesin jáne «Altyn saqa» jazýyn qurap, erekshe kompozısııa jasady. Mýzyka yrǵaǵymen oryndalǵan bı qımyldary fleshmobtyń mazmunyn asha tústi.
Baǵdarlamanyń júrgizýshisi retinde «Aıdar» atty jasandy ıntellekt qoldanyldy. Fleshmob aıaqtalǵan soń, ol elordadaǵy barlyq bilim berý uıymdarynda – balabaqshalar men mektepterde asyq oıynyn bastaý týraly belgi berdi.
Osy sıgnaldan keıin qala boıynsha bir ýaqytta 18 myńnan astam bala asyq oınaýǵa kiristi, bul sharanyń aýqymyn aıqyn kórsetti.
Uıymdastyrýshylardyń aıtýynsha, mundaı bastamalar ulttyq oıyndardyń tárbıelik mánin túsindirýge, sondaı-aq balalardyń dástúrli sportqa degen qyzyǵýshylyǵyn arttyrýǵa yqpal etedi.
