Joba avtory – kúsh mádenıetin zertteýshi, Abylaıhan Qalnazarov. Ekspedısııany «Baluan tas» ulttyq sport túrleri jáne mádenıeti akademııasy uıymdastyryp otyr. Sapar baǵyty qazaq órkenıetiniń tarıhı jáne sakraldy keńistigin qamtıdy: Shymkent qalasy – Saıram aýdany – Ordabasy aýdany – Otyrar aýdany – Báıdibek aýdany – Sozaq aýdany – Saýran aýdany – Túrkistan qalasy.
Ekspedısııa baǵdarlamasynda 13 tarıhı balýan tas nysany tanystyrylady. Qatysýshylar qazaqtyń dástúrli kúsh mádenıetiniń aıryqsha murasy – ataqty batyr-palýandar kótergen balýan tastardy kózben kórip, olardyń tarıhı-ańyzdyq, mádenı mánin zerdeleıdi. Sondaı-aq ekspedısııa barysynda Túrkistan qalasynda ótetin Kókpardan álem chempıonatyn tamashalaý, oblystyń óndiristik jáne ekonomıkalyq ortalyqtaryn aralaý, kıeli oryndarǵa zııarat (Ibragım ata kesenesi, Qarashash ana kesenesi, Bıbiǵııas ana kesenesi, Salyq qoja kesenesi, Báıdibek ata kesenesi, Domalaq ana kesenesi, Ysqaq bab kesenesi, Baba Túkti Shashty Ázız kesenesi, Jylaǵan ata, Aqmeshit áýlıe úńgiri, Arystanbab kesenesi, Qoja Ahmet Iаsaýı kesenesi), tarıhı nysandardy aralaý: Otyrar qalashyǵynyń kóne orny jáne basqa da óńir mýzeıleri, kóne kúshtik rásimdi jańǵyrtý: Ekspedısııa barysynda Otyrar aýdany, Sháýildir aýylynda kóne kúsh rásimderiniń biri qaıta jańǵyrtylyp, mádenı rekonstrýksııa jasalady.
Saparǵa arnaıy jasaqtalǵan «Balýan tas» jýrnalıster men blogerler pýlynyń turaqty ókilderi qatysqan. Onyń quramynda belgili jýrnalıster men blogerler, ǵalymdar, sportshylar bar. Bul – jobanyń ǵylymı nátıjelerin qoǵamǵa keńinen jetkizýge baǵyttalǵan mańyzdy medııalyq qadam.
Aıta keteıik, «Qazaq kúshiniń kartasy» jobasynyń tusaýy byltyr naýryz meıramynda elordada kesilgen bolatyn. Buǵan deıin joba aıasynda Aqtóbe jáne Pavlodar oblystaryna ekspedısııalar uıymdastyrylyp, alǵashqy ǵylymı-mádenı derekter jınaqtaldy. Rettik jaǵynan úshinshi Túrkistan baǵyty – jobanyń rýhanı-tarıhı turǵydan eń mańyzdy kezeńderiniń biri. Sonymen qatar bul jolǵy sapar Naýryz meıramy men Túrkistanda ótetin Kókpardan álemdik chempıonaty is-sharasyna oraılastyrylyp otyr.
Jobanyń basty maqsaty – qazaqtyń dástúrli kúsh mádenıetin zertteý, balýan tastardy ulttyq mura retinde júıeleý, olardy zamanaýı mádenı aınalymǵa engizý, sondaı-aq ulttyq biregeılikti nyǵaıtý.
