Úkimet otyrysynda Oqý-aǵartý mınıstri Juldyz Súleımenova 2026 jyly 3, 4, 7, 8 jáne 9 synyptarǵa arnalǵan oqýlyqtar jańartylatynyn málimdedi. Al 2027 jyly 1 jáne 5 synyptarǵa arnalǵan jańa oqýlyqtar jaryq kóredi. Sonymen qatar osy jyly 10-11 synyptardyń oqýlyqtary, kartalar men tarıhı ákimshilik materıaldar tolyq jańartylyp, qaıta qaralady. 2028 jyly 2 jáne 6 synyptarǵa arnalǵan jańa oqýlyqtardy shyǵarý josparlanǵan.
Mınıstrdiń aıtýynsha, bul qadam oqýshylardyń sapaly bilim alýyna, olardyń analıtıkalyq jáne ǵylymı oılaý qabiletin damytýǵa, sondaı-aq qazirgi ekonomıka talaptaryna saı quzyretterdi qalyptastyrýǵa negiz bolady.
«Dál osy tásil oqýshylardyń sapaly daıyndyǵyn qamtamasyz etýge, olardyń analıtıkalyq jáne ǵylymı oılaýyn damytýǵa, sondaı-aq qazirgi ekonomıkada suranysqa ıe quzyretterdi qalyptastyrýǵa múmkindik beredi. Osylaısha, bilim berý júıesi Memleket basshysynyń alǵa qoıǵan jahandyq ǵylymı-tehnologııalyq ózgerister jaǵdaıynda laıyqty básekelese alatyn tehnologııalyq ult qalyptastyrý jónindegi strategııalyq mindetin dáıekti túrde júzege asyratyn bolady», dedi Juldyz Súleımenova.
Sonymen birge tehnıkalyq jáne kásiptik bilim berýdi damytýǵa basymdyq beriledi. Bul baǵytta óndiris pen bilim berý arasyndaǵy baılanysty nyǵaıtatyn dýaldy oqytý júıesin jetildirý kózdelgen.
Budan bólek, tárbıe jumysy da jańa mazmunmen tolyqpaq. Atap aıtqanda, 5-9 synyptarǵa arnalǵan «Adal Azamat» biryńǵaı baǵdarlamasy, «Konstıtýsııa negizderi», «Zań men tártip» kýrstary, sondaı-aq ekologııalyq bilim berý baǵyttary engiziledi. Bul bastamalar oqýshylardyń azamattyq jaýapkershiligin arttyryp, patrıottyq sanasyn qalyptastyrýǵa yqpal etpek.
Jalpy, qolǵa alynǵan sharalar bilim berý sapasyn arttyryp, zııatker, básekege qabiletti urpaq tárbıeleýge baǵyttalǵan.
