Shahardyń Bilim basqarmasy uıymdastyrǵan aıshyqty joba jurtshylyqqa merekelik kóńil kúı syılady. Fleshmobqa ázirlik birneshe aı buryn bastalǵan. Jobaǵa qala boıynsha 200-den astam mektep pen qosymsha bilim uıymy qatysyp, negizinen 7–10 synyp oqýshylary qamtyldy. Birneshe apta boıy myńǵa jýyq pedagog 11 500 jas ónerpazdy úlken sahnaǵa daıyndaǵan. Uıymdastyrýshylar dombyranyń qońyr úni arqyly ulttyq murany dáriptep, óskeleń urpaqtyń rýhyn kóterý kózdelgenin aıtady.
Oqýshylar bir mezette oryndaǵan mýzykalyq týyndy myńdaǵan dombyranyń únin bir arnaǵa toǵystyryp, jas urpaqtyń birligi men ónerge degen qurmetin kórsetti. Baǵdarlamaǵa Tólegen Muhamedjanov pen Altynbek Qorazbaevtyń ánderi, Nurǵısa Tilendıevtiń kúıleri, sondaı-aq Qurmanǵazynyń «Balbyraýyn» kúıi jańa óńdeýde tańdalyp alynǵan.
Is-sharanyń sharyqtaý shegi – ulttyq rekord resmı tirkeldi. Bilim basqarmasynyń bastamasyn Qazaqstan rekordtar kitaby qoldap, uıym ókilderi qatysýshylar sanyn, oryndaýdyń uzaqtyǵyn (4 mınýt 38 sekýnd), kórkemdik ereksheligin muqııat saralady. Ereksheligi – qatysýshylar bir kúı ǵana emes, túrli janrdaǵy shyǵarmalardan quralǵan kúrdeli popýrrıdi oryndady. Nátıjesinde, «Jappaı jetistikter» sanaty boıynsha jańa rekord resmı tirkelip, arnaıy sertıfıkat tabystaldy.
Aıta keteıik, bul kórsetkish buǵan deıingi Taldyqorǵanda tirkelgen (5 000 adam) rekordtan eki ese asyp túsken. Sonymen qatar Atyraý (2010 jyl – 1 073 adam), Oral (2010 jyl – 1 700 adam) jáne Astana (2024 jyl – 3 200 adam) qalalaryndaǵy nátıjeler de jańartyldy.
ALMATY
