Sońǵy jyldary bul dástúr jańa mazmunmen tolyǵyp keledi. 2024 jyly Memleket basshysy Qasym-Jomart Toqaevtyń bastamasymen engizilgen «Naýryznama» onkúndigi meıramdy júıeli túrde atap ótýge jol ashty. 14-23 naýryz aralyǵyn qamtıtyn bul kezeńniń ár kúnine arnaıy mazmun júktelip, ulttyq qundylyqtardy jańasha dáripteý úrdisi qalyptasty. Kórisý, qaıyrymdylyq, mádenıet pen salt-dástúr, shańyraq, ulttyq kıim, jańarý, ulttyq sport, yntymaq, jyl basy jáne tazarý kúnderi halyqtyń dúnıetanymy men ómir saltyn aıshyqtaıdy.
Osy onkúndiktiń altynshy kúni – Jańarý kúni. Bul kún tek tabıǵattyń túrlenýimen ǵana emes, qoǵamnyń da serpilisin bildiredi. Adam balasy aınalasyn tazalap, oı-sanasyn jańǵyrtyp, jańa bastamalarǵa qadam basady.
Jańarý kúnine oraı elimizde birqatar mádenı jáne qoǵamdyq is-sharalar uıymdastyrylyp otyr. Qazaqstan Respýblıkasynyń Ulttyq ortalyq mýzeıinde «Nur sebele, Ulystyń uly kúni» atty mádenı-tanymdyq baǵdarlama ótedi. Munda dástúr men rýhanı qundylyqtardy nasıhattaýǵa basymdyq berilgen.
Sondaı-aq Mádenıetterdi jaqyndastyrý ortalyǵynda «Jańarýdy – tazalyqtan bastaıyq» atty senbilik ótkizý josparlanǵan. Bul bastama qorshaǵan ortaǵa jaýapkershilikpen qaraý mádenıetin qalyptastyrýǵa baǵyttalǵan. Ulttyq mýzeıde «Naýryz – jańarý men birliktiń meıramy» atty arnaıy mádenı baǵdarlama usynylady.
Al Respýblıkalyq akademııalyq nemis drama teatry kóktemgi saıabaq keńistiginde jastar men jańarý taqyrybyna arnalǵan shyǵarmashylyq baǵdarlama usynbaq. Bul sharalar qoǵamnyń túrli býynyn ortaq qundylyqtar tóńiregine toptastyrýǵa qyzmet etedi.
Merekelik is-sharalar óńirlerde de keńinen jalǵasyp jatyr. Qaraǵandy oblysynda ekologııalyq aksııalar men jastar bastamalary qolǵa alynsa, Aqmola oblysynda eldi mekenderdi abattandyrý jumystary júrgiziledi. Aqtóbe óńirinde taqyryptyq baǵdarlamalar uıymdastyrylyp, qoǵamdyq is-sharalar ótedi. Al Mańǵystaý oblysynda jastar men eriktilerdiń qatysýymen túrli áleýmettik jobalar júzege asyp jatyr.
Jańarý kúni – tek bir kúndik is-shara emes, ol – qoǵamdy tazalyqqa, birlikke, jaýapkershilikke úndeıtin ortaq úndeý. Ulttyq merekeniń jańa mazmuny dástúr men zamanaýı kózqarastyń úılesimin tanytyp, eldiń rýhanı jańǵyrýyna serpin berip keledi.
