Saǵyndyq Qojamseıitov Ulytaý aýdany jáne Jezqazǵan qalasynyń, Qaraǵandy oblysynyń Qurmetti azamaty. О́tken jyly Memleket basshysy Jarlyǵymen «Parasat» ordenimen marapattaldy. Bul marapatqa respýblıkalyq «Ardagerler uıymy» qoǵamdyq birlestiginiń tóraǵasy Baqtyqoja Izmuhambetov basqarǵan ardagerler Keńesi usyndy. Demek bul usynys bar ǵumyryn Ulytaý óńiriniń órkendeýine arnaǵan Saǵyndyq Úsenulynyń eren eńbegine degen qurmeti.
Bıyl naýryz aıynyń tamasha kúninde Saǵyndyq Úsenuly 85 jasqa keldi. Ulytaý oblysy ákimi Dastan Ryspekov ardaqty ardagermen kezdesti. Saltanatty kezdesý barysynda Qazaqstan Respýblıkasy Parlamenti Májilisiniń tóraǵasy Erlan Qoshanovtyń quttyqtaýy tabys etildi. Aqsaqaldyń ıyǵyna shapan jaýyp, izgi tilegin jetkizdi.
Saǵyndyq Qojamseıitovtiń mamandyǵy – jýrnalıst. Qazaq memlekettik ýnıversıtetin, Almaty Joǵarǵy partııa mektebin bitirgen. Mektep qabyrǵasynda «tilshi bala» atanǵan ol nebári 16 jasynda Ulytaý aýdandyq «Stalın týy» (keıin «Kommýnızm týy» ) gazetinde atshy bolyp eńbek jolyn bastaıdy. Ýaqyt óte gazettiń jaýapty hatshysy qyzmetin atqarady. KSRO Jýrnalıster odaǵyna múshelikke ótedi. Jastaıynan eldiń kózine túsip, aýyzǵa ilige bastaǵan eti tiri jas 1961 jyly aýdandyq komsomol komıtetiniń hatshysy, bir jyldan keıin týǵan jeri «Amankeldi» keńsharyna partkom hatshysy bolyp aýysady.
Aýdandyq gazette ocherkter, taldaý maqalalar jazyp tanymal bolǵan jalyndy jas 1965 jyly Qaraǵandy oblystyq «Ortalyq Qazaqstan» gazetiniń Jezqazǵan qalasy men Jezdi aýdany boıynsha menshikti tilshisi bolady. Osynda qyzmet istegen úsh jyldyń ishinde kóbinese óndiris salasynan ótkir syn maqalalar jazyp, qalamynyń qarymyn tanytady. 1966 jyly onyń «Mys magnıtkasy» atty zertteý maqalasy «Qazaqstan» baspasynan shyqqan «Qanattas qalalar» kitabyna enedi.
Keıin Jezdi aýdandyq, Sátbaev qalalyq partııa komıtetiniń úgit-nasıhat bóliminiń meńgerýshisi qyzmetin abyroımen atqarady. 1970 jyldyń ortasynda Jezqazǵan oblystyq partııa komıtetiniń lektorlar tobynyń jetekshisi, úgit-nasıhat bólimi meńgerýshisiniń orynbasary bolsa, 80 jyldary osy bólimniń meńgerýshisi bolyp bekitiledi. Sol jyldyń ortasynda Keńes dáýiriniń «Qurmet belgisi» ordenin keýdesine taǵady. 1989 jyly Jezqazǵan oblystyq atqarý komıteti tóraǵasynyń orynbasary qyzmetine kóteriledi. Osy qyzmette júrgende Ortalyq komıtetke usynyspen shyǵyp, «Ulytaý» ulttyq tarıhı-mádenı jáne tabıǵı qoryq-mýzeıin qurýǵa qol jetkizedi. Sonymen qatar Qaraǵandy polıtehnıka ınstıtýtynyń Jezqazǵandaǵy fılıalyn Jezqazǵan taý-ken tehnologııasy ınstıtýtyna aınaldyrýǵa sebepshi bolady.
Partııa komıtetiniń úgit-nasıhat jumysynda júrgende Jezqazǵan óńiriniń mádenıeti men óneriniń damýyna úles qosty. 1988 jyly Torǵaı oblysy taratylǵanda qazirgi S. Qojamqulov atyndaǵy drama teatrdy Jezqazǵanǵa aýystyrýǵa oblystyq partııa komıtetiniń basshylyǵymen birlese otyryp, kóp jumys atqardy. Jezqazǵan qalasynda dástúrli túrde ótkiziletin otyz jyldan astam tarıhy bar «Ulytaý úni» respýblıkalyq festıvali de Saǵyndyq Úsenulynyń qoldaýymen qolǵa alyndy. Sodan beri óner dodasynda qanshama daryndy ónerpazdar jarqyraı kórindi.
Elimiz Táýelsizdik alǵan jyly Jezqazǵan oblystyq kásiptik-tehnıkalyq bilim berý basqarmasy jáne qujattama jáne muraǵattar basqarmasynyń bastyǵy bolyp istedi. 1997 jyly Saǵyndyq Qojamseıitov Qaraǵandy oblysy memlekettik muraǵatynyń Jezqazǵandaǵy fılıalynyń dırektory qyzmetine taǵaıyndaldy. Reseıdiń, Belorýssııanyń, Qazaqstannyń tájirıbesin zertteı otyryp, Jezqazǵan qalasy memlekettik muraǵatynyń mártebesi jóninde biraz jumys atqarady. Muraǵat fılıalyn derbes Jezqazǵan qalasy memlekettik muraǵaty etip qaıtadan qurý týraly usynyspen aınalysady. Nátıjesinde 1998 jylǵy 15 sáýirdegi №238/5 sheshimine sáıkes qala ákimdiginiń «Jezqazǵan qalasy memlekettik muraǵatynyń uıymdastyrylýy týraly» qaýlysy shyqty. On bes jyldaı Jezqazǵan qalasy memlekettik muraǵatynyń dırektory qyzmetin minsiz atqardy. Eńbegi elendi. Qazaqstan Respýblıkasynyń «Qurmet» ordenimen marapattaldy.
Saǵyndyq Úsenuly memleket jáne qoǵam qaıratkeri ǵana emes, qarymdy qalamger. Ol týrısterge arnalǵan «El urany – Ulytaý», «Qarashańyraq Qarsaqbaı», «Qazaq eliniń kindik mekeni – Jezqazǵan», 1986 jylǵy jeltoqsan kóterilisine qatysýshylarǵa arnalǵan «Namystan jaralǵan halyqpyz» kitaptarynyń avtory. Sonymen qatar «Ulytaý. Ulytaý aýdany» ensıklopedııasyn jazǵan. «Jezqazǵan» ensıklopedııalyq anyqtamalyǵy men «Jezqazǵan. Fotoalbom.» kitaptaryn qurastyrýshy ári bas redaktory.
Keıingi tolqynǵa irilik pen iskerliktiń, kisilik pen kishiliktiń úlgisin kórsetip júrgen Saǵyndyq Qojamseıitov – qos qoǵamdyq júıeniń kýágeri. Ardaqty ardager keńes zamanynda jáne elimiz egemendik alǵanda da halyqqa qyzmet etti. Áli kúnge deıin qoǵamdyq jumystan qol úzgen joq. Sońǵy demi qalǵansha, qyzmet ete beredi.
Ulytaý oblysy
