Foto: Vıdeoskrın
36 jastaǵy azamat Taılandta demalyp júrgende kenetten jaǵdaıy kúrt nasharlap, jedel pankreatıt saldarynan asqyný paıda bolǵan. Aǵzalary isten shyǵa bastaǵan soń dárigerler ony jasandy komaǵa engizgen. Naýqas eki apta boıy es-tússiz jatqan.
Jansaqtaý bólimindegi bir táýliktiń ózi týystaryna shamamen 1 mln teńgege túsken. Osy sátte kóptegen Qazaqstan azamattary beıjaı qalmaı, kómek qolyn sozǵan. Nátıjesinde aǵzasy syrqatpen kúresip, arada bir jarym aıǵa jýyq ýaqyt ótkende Alekseı alǵash ret jurtqa ún qatty.
«Ortaq qoldaýdyń arqasynda qazir sizderge vıdeo joldap otyrmyn. О́zimdi jaqsy sezinemin, esim durys, qaıda ekenimdi, qandaı jaǵdaıda ekenimdi tolyq túsinemin», deıdi ol.
Degenmen em-dom áli jalǵasyp jatyr. Uzaq ýaqyt qozǵalyssyz jatqandyqtan, denesinde jara paıda bolyp, oǵan ota jasalǵan. Keıin dárigerler ókpeden tromb anyqtaǵan. Qazirgi tańda naýqastyń ishine suıyqtyqty shyǵaratyn arnaıy tútikter qoıylǵan. Ol ázirge ózdiginen otyra da almaıdy.
Aǵasy Tıhon Vıvtonenkonyń aıtýynsha, Alekseıdiń denesi áli álsiz. Qozǵalys qabileti óte tómen. Qazirgi jaǵdaıy qalypty adamnyń shamamen 15-20% deńgeıinde ǵana.
Taılandtaǵy Phýket aýrýhanasynda emdelý jansaqtaý bóliminen arzandaý bolǵanymen, sheteldikke kórsetiletin barlyq qyzmet aqyly negizde júrgiziledi. Týystarynyń aıtýynsha, naýqasty Qazaqstanda emdeý qarjylaı da, moraldyq turǵydan da áldeqaıda jeńil bolar edi.
Osyǵan baılanysty olar birneshe ret Densaýlyq saqtaý mınıstrligine júgingen. Alǵashqy bas tartý – naýqastyń jaǵdaıy tym aýyr bolǵandyqtan berilse, ekinshi joly – kerisinshe, onyń ózdiginen tynys alyp, esi anyq bolǵany esebinen kórsetilgen.
Bul jaǵdaıǵa qatysty depýtat Murat Ábenov pikir bildirip, máseleni qatań baqylaý keregin aıtty.
«Eger sarapshylar onyń jaǵdaıy aýyr ekenin rastasa, sanavıasııa arqyly jetkizý – adamnyń zańdy quqyǵy. Qazir adamdar suranbaýy kerek, talap etýi tıis. Qajet bolsa, sotqa júginý kerek», dedi depýtat.
Al mınıstrlik ókilderiniń ustanymynsha, qazirgi jaǵdaı medısınalyq avıasııamen tasymaldaýǵa sáıkes kelmeıdi.
Sonymen qatar, oǵan sanavıasııa kómegi úshinshi ret te berilmegeni belgili boldy. Qazir ol esin jıǵanymen, eki aptaǵa sozylǵan medıkamentozdy komadan keıin aǵzasy áli álsiz. Dárigerler onyń ushýyna tek medısına qyzmetkeriniń baqylaýymen ǵana ruqsat berýi múmkin ekenin aıtady.
«Biz tek medısınalyq kórsetkishterge súıenemiz. Áleýmettik faktorlar qarastyrylmaǵan. Sheteldik áriptester de naýqasty turaqty reıspen tasymaldaýǵa bolatynyn joqqa shyǵarmaıdy. Mundaı jaǵdaılar buryn da bolǵan», deıdi Ulttyq shuǵyl medısınany úılestirý ortalyǵynyń basshysy Erjan Ádilbekov.
Qazirgi tańda Alekseıdiń jaqyndary shetelde emdi jalǵastyrý úshin qarajat jınap jatyr. Al naýqastyń elge oralý máselesi áli de ashyq kúıinde qalyp otyr.
Qazaqstan – Amazon Prime men Euronews nazarynda: Týrıstik týrlar sany 3 ese artty
