Atalǵan is-shara Naýryz merekesine oraı uıymdastyrylmaqshy. Onda qala turǵyndary men qonaqtaryna ulttyq jáne álemdik ashananyń úzdik taǵamdary usynylady.
Festıvalge Qazaqstannan jáne shetelden kelgen halyqaralyq deńgeıdegi 10 aspaz qatysyp, sheberlikterin kórsetedi.
Festıval aıasynda kelesi nomınasııalar boıynsha gastronomııalyq baıqaýlar uıymdastyrylady:
– úzdik káýap;
– úzdik palaý;
– úzdik samsa;
– úzdik ulttyq taǵam.
Sonymen qatar, is-sharaǵa shamamen 50 jergilikti meıramhana qatysyp, kelýshilerge túrli taǵamdar usynady.
Festıval tek gastronomııalyq sharalarmen shektelmeı, aýqymdy mádenı-oıyn-saýyq baǵdarlamasymen jalǵasady. Qonaqtardy street style jáne K-pop baǵyttaryndaǵy Dance Battle, dombyrashylar ansambliniń óner kórsetýi, batyrlar shoýy, sırk qoıylymdary, motosherý, sporttyq avtokólikter kórmesi, sondaı-aq qolónershiler jármeńkesi kútedi.
Is-shara birneshe taqyryptyq aımaqtarǵa bólinip uıymdastyrylady. Etnoaımaqta gastronomııalyq baıqaýlar men halyqaralyq aspazdardyń sheberlik sabaqtary ótedi, al eýropalyq aımaqta zamanaýı shoý-baǵdarlamalar, bı baıqaýlary jáne motoshoý usynylady. Sonymen qatar, Arbat aýmaǵynda kúni boıy qolónershiler kórmesi jumys isteıdi.
Festıvaldiń resmı ashylýy saltanatty túrde ótedi, al keshki ýaqytta jeńimpazdardy marapattaý rásimi men konserttik baǵdarlama uıymdastyrylady. Ártister men arnaıy shaqyrylǵan hedlaınerler óner kórsetedi.
«DamDastour» halyqaralyq gastronomııalyq festıvali − bul Naýryz merekesiniń atmosferasyn sezinýge, túrli halyqtardyń ashanasymen tanysýǵa jáne otbasy, dostarmen birge ýaqytty kóńildi ótkizýge múmkindik beretin aýqymdy mádenı is-shara.
Shymkent qalasynyń ákimdigi qala turǵyndary men qonaqtaryn osy merekelik is-sharaǵa qatysýǵa shaqyrady.
