Týrızm jáne sport mınıstrliginiń málimetinshe, atalǵan is-shara Naýryz meıramyn atap ótý aıasynda ótkizilip, qala turǵyndary men qonaqtaryna ulttyq jáne álemdik ashananyń tańdaýly úlgilerin tanystyrýǵa baǵyttalǵan. Sonymen qatar bul is-shara mańyzdy oqıǵalar kúntizbesine engizilgen. Festıvalge Qazaqstannan jáne shetelden kelgen halyqaralyq deńgeıdegi 10 shef-aspaz qatysyp, ózderiniń avtorly taǵamdaryn usynyp, aspazdyq sheberlikterin kórsetedi.
Festıval aıasynda túrli gastronomııa baıqaýlary uıymdastyrylady.
Is-shara keń aýqymdy mádenı-oıyn-saýyq baǵdarlamasymen qatar ótedi. Qonaqtardy street style jáne K-pop baǵyttaryndaǵy Dance Battle, dombyrashylar ansambliniń óner kórsetýi, batyrlar shoýy, sırk qoıylymdary, motosherý men Moto Show, sport avtokólikteri kórmesi, sondaı-aq qolónershiler jármeńkesi kútedi.
Is-shara birneshe taqyryptyq aımaqqa bólinip uıymdastyrylady. Etnoaımaqta gastronomııa baıqaýlary men halyqaralyq shef-aspazdardyń sheberlik sabaqtary ótedi, al eýropalyq aımaqta zamanaýı shoý-baǵdarlamalar, bı baıqaýlary jáne motoshoý usynylady. Sonymen qatar Arbat aýmaǵynda kúni boıy qolónershiler kórmesi jumys isteıdi.
Festıvaldiń resmı ashylýy saltanatty túrde ótedi, al keshki ýaqytta jeńimpazdardy marapattaý rásimi men konserttik baǵdarlama uıymdastyrylady. Baǵdarlamada otandyq ártisterdiń óner kórsetýi jáne arnaıy shaqyrylǵan hedlaınerdiń konserti qarastyrylǵan.
Aıta keteıik, atalǵan is-shara 2026 jylǵy 21 naýryz kúni saǵat 12:00-de Shymkent qalasyndaǵy Ál-Farabı alańynda ótedi.
