Keshe Aqordada Qazaqstan Respýblıkasynyń Memlekettik hatshysy Gúlshara Ábdiqalyqova Japonııanyń Qazaqstandaǵy Tótenshe jáne ókiletti elshisi Masaesı Kamoharamen kezdesti.
Kezdesý barysynda Memlekettik hatshy Japonııanyń Qazaqstan úshin mańyzdy strategııalyq áriptes ekenin jetkizip, eki eldiń arasyndaǵy saıası jáne áleýmettik-ekonomıkalyq yntymaqtastyqty odan ári damytýǵa Qazaqstan jaǵy múddeli ekenin atap ótti. Elbasy N.Nazarbaevtyń 2008 jyldyń maýsym aıynda Japonııaǵa jasaǵan saparynyń nátıjesi strategııalyq seriktestikti nyǵaıtýǵa yqpal etkendigi de aıtyldy. Sonymen qatar, G.Ábdiqalyqova Qazaqstan men Japonııanyń úkimettik jáne jeke sektorlarynyń ekonomıkalyq yntymaqtastyq jónindegi birlesken komıssııasynyń qyzmetin joǵary baǵalady.
2014 jyly Qazaqstan men Japonııa arasyndaǵy taýar aınalymy 1,7 mlrd. AQSh dollaryn qurady, sonyń ishinde eksport – 741 mln. dollar, al ımport 925 mln. dollar boldy. Kezdesý barysynda áleýmettik-gýmanıtarlyq saladaǵy Qazaqstan-Japonııa qarym-qatynastaryn damytýdyń ózekti máseleleri qozǵaldy. G.Ábdiqalyqova eki el halyqtarynyń ósip kele jatqan ózara múddelestigi jaǵdaıynda mádenı almasýlardyń mańyzdylyǵyna erekshe toqtalyp, mádenıet salasynda ekijaqty kelisim jasaý múmkindigin qarastyrýdy usyndy. Kezdesý sońynda taraptar genderlik teńdik máselelerin, sonyń ishinde 1995 jyly ótken BUU-nyń áıelder ahýaly jónindegi tórtinshi búkilálemdik konferensııasynda qabyldanǵan Beıjiń deklarasııasy men Is-qımyldar tuǵyrnamasy aıasyndaǵy máselelerdi talqylady. Sondaı-aq, Japonııa elshisi Memlekettik hatshyǵa bıylǵy jyldyń tamyz aıynda Tokıo qalasynda ótetin 2-shi Búkilálemdik áıelder konferensııasyna qatysýǵa Japonııa Premer-mınıstri H.Abeniń shaqyrýyn tabys etti. Kezdesýge Qazaqstan tarapynan Áıelder isteri jáne otbasylyq-demografııalyq saıasat jónindegi ulttyq komıssııa tóraıymynyń orynbasary, Májilis depýtaty Elena Tarasenko, Japonııa tarapynan Parlamenttik bilim, mádenıet, sport, ǵylym jáne tehnologııa aǵa vıse-mınıstri Motoıýkı Fýdzıı, Mádenıet agenttiginiń dúnıejúzilik muralar jónindegi bóliminiń dırektory Takahıro Okamota qatysty.
Jaqsybaı SAMRAT, «Egemen Qazaqstan».
