Máselen, Aqqaıyń aýdanyndaǵy janarmaı quıý beketinde «Lada Granta» avtokóligimen kelgen 25 jastaǵy azamattan 5 gramm sıntetıkalyq esirtki tabyldy. Segiz oramǵa bólip salynǵan psıhotroptyq zattardyń arnaıy taratý maqsatynda daıyndalǵany kórinip tur. Mundaı esirtkiniń 2,5 gramyn alyp júrgen adamnyń ózi uzaq merzimge sottalady. Al bul buryn da birneshe márte sotty bolǵan kúdikti jazasyn ótep shyqqan boıda bir aı boıy esirtki taratýmen aınalysqan. Endi ol 12 jylǵa deıin bas bostandyǵynan aıyrylýy múmkin.
Sondaı-aq Petropavl qalasynda kúdikke ilingen 19 jastaǵy jigitten de sıntetıkalyq esirtki zattary tabylǵan. Ustaý kezinde jas jigitten untaq tárizdi zaty bar 19 orama tárkilendi. Saraptama nátıjesinde onyń α-PVP dep atalatyn psıhotroptyq zat ekeni anyqtalǵan. Tárkilengen zattyń salmaǵy – 35 gramm. Qazir bul iske qatysty sotqa deıingi tergep-tekserý júrgizilip jatyr. Polısııanyń málimetinshe, kúdikti tyıym salynǵan zattardy satýmen aınalysatyn ınternet-dúkenderdiń birine «jasyryn ornalastyrýshy» retinde bir aı buryn jumysqa turǵan. Qazir qamaýda otyr. Esirtki zattaryn asa iri mólsherde ótkizý faktisi boıynsha oǵan da 7 jyldan 12 jylǵa deıin bas bostandyǵynan aıyrý jazasy qaýpi tónip tur.
Petropavl qalasy Jumysshy kentiniń 39 jastaǵy turǵyny da qala aýmaǵynda esirtki ótkizýmen aınalysty degen kúdikpen ustaldy. Kúdiktiniń turǵylyqty jerin tekserý barysynda tártip saqshylary shamamen 75 gramm geroın tárkiledi. Bul asa iri mólsherge jatady. О́ziniń aıtýynsha, ol geroındi elordadan alyp kelgen. Medısınalyq kýálandyrý nátıjesi ustalǵan adamnyń opıoıdterdi qoldanǵanyn kórsetti. Aıta ketý kerek, kúdikti buǵan deıin de urlyq jáne esirtki zattarynyń zańsyz aınalymy boıynsha sottalǵan. Alaıda ótkennen esh sabaq almaǵan ony endi qatań jaza kútip tur. Bul – jyl basynan beri oblysta geroın anyqtalǵan jalǵyz derek. Jalpy, qańtar aıynan bastap óńirde polıseıler 39 esirtki qylmysyn tirkep, zańsyz aınalymnan 1 600 gramnan asa túrli esirtki zattaryn tárkiledi. Onyń 900 gramy – sıntetıkalyq esirtkiler.
Petropavl qalasyndaǵy garaj kooperatıvteriniń biriniń aýmaǵynda polıseıler kúdikke ilingen «Volkswagen Golf» avtokóligin toqtatady. Kóliktegi jolaýshy Soltústik Qazaqstan oblysy aýdandarynyń birinde turatyn 28 jastaǵy jigit eken. Onyń bel sómkesinen suıyqmaı tárizdi zat quıylǵan 5 kapsýla jáne shylym shegýge arnalǵan quraldar shyqty. Bul – esirtki zattaryn jasyryn oryndarǵa qaldyrý maqsatynda jasalatyn quraldar. Osy tásilmen kúdikti psıhotroptyq zattar taratqany belgili boldy. Saraptama nátıjesinde tárkilengen zat kannabıs syǵyndysy, ıaǵnı gashısh maıy bolyp shyqty. Kúdiktiniń turǵylyqty mekenjaıynan taǵy 10 kapsýla esirtki zaty, 24 bos kapsýla tárkilendi. Medısınalyq kýálandyrý er adamnyń esirtki qoldanǵanyn kórsetti. Kúdiktiniń aıtýynsha, ol shamamen eki aı boıy «zakladchık» retinde jumys istegen. Qazirgi ýaqytta ol qamaýǵa alyndy. Asa iri mólsherde psıhotroptyq zattardy ótkizý faktisi boıynsha sotqa deıingi tergep-tekserý júrgizilip jatyr. Kúdiktige 6-dan 10 jylǵa deıin bas bostandyǵynan aıyrý jazasy qarastyrylǵan.
Al myna oqıǵa oblystyń «Batys» baqylaý-ótkizý beketinde tirkeldi. Polısııa qyzmetkerleri Petropavl qalasynyń 37 jastaǵy turǵyny júrgizip kele jatqan «Lada Granta» avtokóligin toqtatyp, tekseris júrgizgende jalpy salmaǵy 405,36 gramm bolatyn α-PvP atty sıntetıkalyq esirtki zaty salynǵan oramalar tárkilendi. Bul – bıyl oblysta anyqtalǵan eń iri sıntetıkalyq esirtki partııasy. Júrgizýshi esirtki zattaryn ınternet arqyly satýmen aınalysatyn zańsyz «narkoshoptardyń» birinde jumys isteıtin bolyp shyqty. Ol 2025 jyldyń jeltoqsan aıynda esirtkini jasyrýshy bolyp kirisip, keıingi ýaqytta qylmystyq ıerarhııada «joǵarylap», tasymaldaýmen aınalysýǵa kelisken eken. Alaıda Qostanaıdan Petropavl qalasyna psıhotroptyq zattardy jetkizýge baǵyttalǵan alǵashqy saparynda qolǵa tústi.
Mine, osylaısha «ońaı» olja tabý jolyna túskender óz ómiriniń basym bóligin temir tordyń artynda ótkizýge óz erikterimen qadam basyp keledi. Al eńbek etemin degen azamattar úshin Petropavl qalasynda laıyqty jumys oryndary jetkilikti. Onyń ústine, óńirde qanshama jańa óndiris oryndary ashylyp jatyr.
Soltústik Qazaqstan oblysy
