Marapat Tao Mınsıýdiń Qytaı medıakeńistiginde Qazaqstandy tanytýǵa, onyń mádenı murasy men týrıstik áleýetin nasıhattaýǵa, sondaı-aq Qazaqstan men Qytaı arasyndaǵy gýmanıtarlyq baılanystardy nyǵaıtýǵa qosqan úlesi úshin berildi.
Marapattaý rásimi barysynda Aıda Balaeva Tao Mınsıýdiń eki el halqy arasyndaǵy dostyqty nyǵaıtýdaǵy eńbeginiń mańyzyn atap ótti.
«II dárejeli «Dostyq» ordeni – Qazaqstan men Qytaı arasyndaǵy dostyq pen gýmanıtarlyq baılanystardy nyǵaıtýǵa qosqan úlesińizdiń joǵary memlekettik baǵasy. Sizdiń eńbegińizdiń arqasynda mıllıondaǵan adam Qazaqstandy, onyń baı mádenı murasyn, kórkem tabıǵatyn jáne týrıstik áleýetin jaqynyraq tanydy», dedi Aıda Balaeva.
Tao Tao esimimen de tanymal bloger Qazaqstanǵa alǵash ret 2024 jyly qyrkúıekte arnaıy shaqyrylǵan medıa-ınflıýenser retinde kelgen edi. Sodan beri ol Astana, Almaty qalalarynda, sondaı-aq Aqmola, Almaty, Shyǵys Qazaqstan jáne Mańǵystaý oblystarynda bolyp, jıyntyq qamtylymy 1 mlrd-tan asatyn 100-den asa materıal jarııalady. 2025 jylǵy mamyrda oǵan «Qazaqstan týrızminiń elshisi» qurmetti mártebesi berildi. Qazaqstanǵa besinshi sapary aıasynda bloger Almaty – Aqtaý – Túrkistan baǵytymen saparlap, Amal jáne Naýryz merekelerine arnalǵan is-sharalarǵa qatysty.
Qytaılyq blogerdi marapattaý – Qazaqstan men Qytaı arasyndaǵy yntymaqtastyqtyń keń aýqymdy nyǵaıý úderisiniń bir kórinisi. Búginde eki eldiń qarym-qatynasy jan-jaqty strategııalyq áriptestiktiń buryn-sońdy bolmaǵan joǵary deńgeıine kóterildi. Bul baǵytta Memleket basshysy Qasym-Jomart Toqaev pen Qytaı Halyq Respýblıkasynyń Tóraǵasy Sı Szınpın arasyndaǵy dostyq qatynastar aıryqsha ról atqaryp, ekijaqty baılanystardy odan ári tereńdetýdiń berik baǵdaryn aıqyndap otyr.
Yntymaqtastyqtyń negizgi baǵyttarynyń biri mádenı-gýmanıtarlyq sala bolyp qala beredi. 2026 jyly Qazaqstan men Qytaı mádenıetiniń toǵyspaly jyly ótip jatyr. Bul bastama teatr, kıno, kórme qyzmeti, kreatıvti ındýstrııalar jáne gastroldik almasýlar salalaryndaǵy ózara yqpaldastyqty keńeıtýdiń mańyzdy alańyna aınaldy.
Qol jetkizilgen ýaǵdalastyqtardyń mańyzdy nátıjeleriniń biri – Beıjiń qalasynda Qazaqstannyń mádenı ortalyǵynyń ashylýy. Bul – shetelde ashylǵan alǵashqy ári ázirge jalǵyz qazaqstandyq osyndaı mekeme. Ortalyqta Qytaıda qazaq mádenıetin, tilin, óneri men tarıhyn ilgeriletýdiń, sondaı-aq kórmeler, dárister, konsertter, sheberlik sabaqtary men bilim berý baǵdarlamalary ótkiziledi.
Týrıstik yntymaqtastyq ta qarqyndy damyp keledi. 2024 jyly Qazaqstanǵa Qytaıdyń 655 myń azamaty kelse, byltyr bul kórsetkish 968 myń adamǵa jetti. Bul baǵytqa 2026 jylǵy 29 naýryzda «Air Astana» áýe kompanııasy iske qosqan Almaty – Shanhaı tikeleı áýe reısi qosymsha serpin berdi. Jańa baǵyt týrızmdi, iskerlik baılanystardy jáne gýmanıtarlyq almasýlardy damytýǵa qosymsha múmkindik ashady.
