Sýretti túsirgen – Erlan OMAR, «EQ»
Onlaın baıqaýda memlekettik týlardyń ásemdigine basymdyq berilgen. Týrnırge 64 eldiń baıraǵy qoıylǵan. Ár raýndta týlar daýys berý arqyly joǵary nemese tómen kóterilip otyrǵan. Altynshy sheshýshi raýndta Qazaqstannyń kók baıraǵy basym daýys jınap, birinshi oryndy ıelendi. «Qazaqstan – bizdiń chempıon! Barshańyz daýys berip, bul álemdegi eń úzdik tý dep sheshtińizder!» delingen jarııalanymda.
Ekinshi orynǵa – Kırıbatı, úshinshi – Býtan, al tórtinshi orynǵa Seıshel araldarynyń memlekettik týlary ıe boldy. Sondaı-aq Ulybrıtanııa, Brazılııa, Shrı-Lanka, Iаmaıka men Papýa-Jańa Gvıneıanyń týlary da qatysýshylardyń qoldaýyna ıe bolyp, kóp daýys jınady.
Memlekettik rámizderimizge degen qurmet pen ony ulyqtaý jolyndaǵy jaýapkershiligimiz aldaǵy ýaqytta da arta túspek. Osy oraıda Qyzylorda qalasyndaǵy Quryltaı otyrysynda Prezıdent Qasym-Jomart Toqaev memlekettik rámizderge, onyń ishinde kók baıraǵymyzǵa erekshe toqtalǵanyn atap ótken jón. Ulttyq rámizderge qurmetimizdi arttyrý maqsatynda Úkimet 2020 jyly Tý, Eltańba beınelerin ornatyp, ornalastyrý, Gımnniń mátinin paıdalaný erejelerin bekitken edi. Alaıda qoǵamda áli kúnge baıraǵymyzdyń qashan, qaı jerde jelbirep turatynyn bilmeıtinder kóp. Osyny eskergen Memleket basshysy bul máseleni qaıta qozǵady.
«Qazir qoǵamda «Qazaqstannyń memlekettik Týyn qaıda jáne qashan qoldanǵan jón?» degen mańyzdy másele talqylanyp jatyr. Bul másele arnaıy normalarmen jáne erejelermen retteledi. Memlekettik rámizderdi paıdalanýǵa jeńil-jelpi, salǵyrt qaraýǵa bolmaıdy. Zań talaby árdaıym oryndalýǵa tıis. Degenmen, eń aldymen, zańnyń túpki mánin tereń túsiný kerek. Memlekettik rámizderdi qadirlep, olardy jónimen paıdalanatyn otanshyl azamattardy barynsha qoldaý qajet. Men úılerde, kólikterde, kóshelerde, sondaı-aq elimizdegi, ásirese sheteldegi sporttyq jáne mádenı is-sharalarda kók Týymyz jelbirep turǵanda qýanyp qalamyn. Sol arqyly elimizdiń azamattary birligi bekem ult ekenimizdi kórsetedi. Olardyń áreketterinen týǵan elin maqtan tutatyny baıqalyp turady», dedi Prezıdent V Quryltaı otyrysynda.
Elimizde memlekettik rámizderdi qoldanýǵa qatysty arnaıy zańnamalyq tártip bar. Tipti táýelsizdiktiń alǵashqy jyldarynda ony paıdalanýdyń tártibi men sharttary barynsha qatańdatylǵan. Ol ýaqytta kók baıraǵymyzdy kez kelgen jerde jelbiretýge tyıym salyndy. Alaıda Prezıdent memlekettik rámizderdi halyqtyń jappaı qoldanýyna qatysty buryn qabyldanǵan shekteýlerdi azaıtyp, el azamattarynyń memlekettik týdy óz turǵyn úıleriniń balkondaryna nemese qabyrǵasyna ilýine zańdy turǵydan ruqsat berý qajet dedi.
Negizi mundaı tájirıbe álemniń kóptegen elinde bar. Máselen, Túrkııada barlyq eldi mekende kópqabatty úı qabyrǵalary, balkondary, jalpy mańyzdy nysandardyń syrtqy qasbetteri qyzyl tústi el baıraǵymen kómkerilip turady. Buqaralyq is-sharalarda, sporttyq saıystarda, tipti jekemenshik úılerdiń tórinde memlekettik tý ilinip turady. Al Ulybrıtanııada ertede kınoteatrlar men basqa jerlerde fılm kórsetilmes buryn memlekettik ánuran oınalǵan. Bul úrdis qazir tolyqtaı saqtalmaǵan, dese de tarıhı qundylyqtaryn qasterleýge beıimdelgen eldiń keıbir qalalarynda fılm bastalar aldynda áli de ánuran shyrqalady. Osy sebepti ár brıtandyq azamattyń Union Jack nemese ulttyq ánuranǵa qurmetsizdik kórsetýi múmkin emes.
Prezıdent tapsyrmasyna sáıkes, 2020 jyly Memlekettik rámizderdi paıalanýǵa qatysty zańnamaǵa ózgerister men tolyqtyrýlar engizilip, azamattardyń Memlekettik týdy patrıottyq maqsatta paıdalanýyna múmkindik jasaldy. Qazir azamattar ózi turatyn úıdiń balkonyna, terezesine nemese kóligine Kók týymyzdy jelbiretip ile alady. Tek memlekettik rámizdiń taza bolýyna, onyń durys ilinýine, zańnamada belgilengen standarttarǵa sáıkes bolýyna nazar aýdarý qajet.
