Sarapshylardyń aıtýynsha, elektr energııasyna suranys jyl saıyn artyp keledi. О́nerkásip, qurylys, turǵyn úı-kommýnaldyq sharýashylyq pen sıfrlyq sektor damyǵan saıyn qosymsha qýat kózderi qajet. Generasııalaıtyn qýattardyń shamamen 60 paıyzy 30 jyldan astam ýaqyt buryn iske qosylǵan. Tozǵan jabdyqtar júıeniń múmkindigin shektep otyr.
Energetıka sarapshysy Áset Naýryzbaev tapshylyq ásirese qys mezgilinde kúsheıetinin aıtady. Ońtústik óńirlerde tutyný kólemi qoldaǵy qýattan asyp túsedi. Osyndaı kezeńderde júktemeni teńestirýge kórshi elderden elektr energııasy satyp alynady. Onyń aıtýynsha, bıyl qosymsha 621 MVt qýat iske qosylady. Onyń basym bóligi jańartylatyn energııa kózderi esebinen qamtamasyz etiledi.
Maman máseleni sheshý maqsatynda jańa stansalar salýmen qatar qoldanystaǵy ınfraqurylymdy jańartý qajet ekenin aıtady. Elektr jelilerindegi shyǵyn keı óńirlerde 17 paıyzǵa deıin jetedi. Bul – iri stansanyń qýatyna teń kórsetkish. Sondyqtan jelilerdi jańǵyrtý, sıfrlyq tehnologııalardy engizý men energııa tıimdiligin arttyrý mańyzdy.
Sarapshylar aldaǵy jyldary 6,7 GVt bolatyn ondaǵan jobany iske qosý josparlanyp otyrǵanyn aıtady. Uzaqmerzimdi josparǵa atom elektr stansasyn salý da kiredi. Alaıda mundaı nysandar iske qosylǵansha qoldaǵy qýatty saqtaý basty mindet bolyp qala beredi.
Mamandardyń pikirinshe, elimiz ázirge dástúrli energııa kózderinen tolyq bas tarta almaıdy. Eldegi elektr energııasynyń shamamen 70 paıyzy kómirmen jumys isteıtin stansalarda óndiriledi. Jańartylatyn energııa kózderi damyp kele jatqanymen, olardyń úlesi áli jetkiliksiz.
Sala ókilderi jańa qýat kózderin kezeń-kezeńimen iske qosý arqyly ımportqa táýeldilikti azaıtýǵa bolatynyn aıtady. Biraq bul úshin ınfraqurylymdy júıeli jańartý men uzaqmerzimdi ınvestısııa qajet.
