Búginde qarymdy qalamger Qostanaı qalasynda turady. Sondaǵy A.Baıtursynuly atyndaǵy Qostanaı óńirlik ýnıversıtetiniń professory. Keshti de osy joǵary oqý ornynda ǵalymnyń aldynan tálim alǵan shákirtteri uıymdastyrdy.
Shynynda, jurtshylyq Serikbaı aǵany aldymen aqyn dep biledi. Búginge deıin shaıyrdyń otyzǵa jýyq jyr jınaǵy jaryq kórgen. Sonymen qatar aqynnyń 200-den asa óleńine án jazylǵan. Sonyń ishinde Altynbek Qorazbaev ánin shyǵarǵan «Saǵyndym Almatymdy» búkil el súıip aıtady.
Kesh barysynda qalamgerdiń aqyndyǵy men ǵalymdyǵy týraly kóbirek sóz boldy. Máselen, belgili aqyn Serik Turǵynbekuly bir topyraqta týyp, jas kúninen birge ósken dosynyń san qyrly talanty jaıynda áńgimeledi.
«Men Serikbaı týraly kóp jazdym. О́leń de arnadym. Serikbaı – segiz qyrly, bir syrly azamat. Eger shuqylaı berseńiz, onyń boıynan seksen qyryn taýyp alasyz. Bala kúnimizden ázilimiz de, minezimiz de jarasyp óstik. Onyń ǵalymdyǵy da bir tóbe. Ybyraı atamyzdy zerttep, biraz jumys tyndyrdy», dedi ol. Al «Qazaq gazetteri» seriktestiginiń bas dırektory, akademık Dıhan Qamzabekuly aqynnyń árbir janrda jazǵan eńbegi maqtaýǵa da, úlgi alýǵa da turarlyq ekenin jetkizdi.
– Serikbaı Ospanuly – san-salaly shyǵarmashylyq ıesi. Men Serikbaı aǵany egde tartqanda kórdim. Bul kisi jas kezinde qandaı boldy dep oılaýshy edim. Búgingi keshte jas kezindegi sýretterin kórip, tamasha kórkem jigit bolǵanyn baıqadym. Eger osy kisimen qatar bolsam, dos bolar edim dep oıladym. Eger zamandasy bolsam, pikir alysatyn jaqyn áriptesi bolar edim dep oıladym. Sondyqtan Serikbaı aǵa – ár kezeńde de ortaǵa unaıtyn tulǵa. Jazǵan eńbekteri de sondaı. Sekeń Ybyraı Altynsarın týraly kólemdi zertteý jazdy. Bir qaraǵanda, kórnekti aǵartýshy týraly bárimiz biletin sekildimiz. Shyn máninde, birtýar tulǵanyń kóp dúnıesin bilmeımiz. TÚRKSOI uıymynyń aıasynda jaryq kórgen Ahmet Baıtursynuly týraly eńbegin de erekshe aıtýǵa bolady, – dedi akademık.
Sondaı-aq fılologııa ǵylymdarynyń doktory, professor Serik Negımov, Qazaqstannyń eńbek sińirgen qaıratkeri, qalamger Qaısar Álim kórkemsóz zergeriniń jan-jaqty shyǵarmashylyǵy jaıynda parasatty oı órbitti. Jıynda qalamgerdiń keıingi shyqqan «Meıirim bastaýy – besik jyry», «Aqynnyń jany», «Serikbaı: lebiz, iltıpat» atty kitaptary tanystyryldy. Aqyn sózine jazylǵan ánder oryndaldy. Kesh ıesi oqyrman suraqtaryna jaýap berip, shyǵarmashylyǵyndaǵy jańalyqtar týraly baıandady. Is-shara sońynda Serikbaı Ospanuly jınalǵan qaýymǵa rızashylyǵyn bildirdi.
