Saıys betasharynda Qazaqstan teleradıokorporasııasy basqarma tóraǵasynyń orynbasary Erkin Muhamedjanov sóz sóılep, 1966 jyldyń 1 qańtarynda Qazaqstannyń halyq ártisi Ánýarbek Baıjanbaevtyń únimen efırge shyqqan radıonyń ult rýhanııatynyń kemeldenýine qosqan ólsheýsiz úlesin atap ótip, «Shalqar» radıosynyń alpys jyldyq mereıtoıynyń ataýsyz qalmaýy keregin aıtty. Sondaı-aq Erkin Tańatqanuly saıysqa túsýge saqadaı saı turǵan qoǵam qaıratkerleri, aqyn-jazýshylar, teatr maıtalmandary men jýrnalısterge aq jol tiledi.
Basqarma tóraǵasynyń orynbasarynan keıin belgili qalamger, tarıhshy Qoıshyǵara Salǵara jarysta baq synaýǵa kelgen tastaıaqshylarǵa bata berip, alǵashqy aqjoltaı shardy soqty. Osylaı jarty ǵasyrdan astam ýaqyt boıy qazaq tilinde efırge shyǵyp kele jatqan radıonyń júldesi úshin mergenderdiń «jan alysyp, jan berisken» saıysy bastaldy.
Birneshe saǵatqa sozylǵan tartysty oıynda birneshe azamat arnaıy dıplomdarmen marapattalyp, júldeli úshinshi oryndy Q.Qýanyshbaev atyndaǵy Qazaq drama teatrynyń ártisi Qýandyq Qystyqbaev, ekinshi oryndy «Habar» agenttiginiń mýzykalyq prodıýseri Talant Arǵynǵalı jeńip aldy. Al bas júlde Parlament Senatynyń depýtaty Altynbek Nuhulynyń qanjyǵasyna baılandy.
