Jıynda Úkimet basshysy Memleket basshysynyń tapsyrmasyna sáıkes Konstıtýsııany túsindirý jónindegi keshendi jospar bekitilgenin eske saldy. Búginde bul baǵytta sarapshylar men qoǵam qaıratkerleriniń qatysýymen Konstıtýsııanyń barlyq jańashyl normalary boıynsha aqparattyq-túsindirý jumystary júrgizilip jatyr.
«Memleket basshysynyń tapsyrmasyna sáıkes Úkimet elimizdiń Konstıtýsııasyn túsindirý jónindegi is-sharalar josparyn bekitti. Qazirgi tańda sarapshylar men qoǵam qaıratkerleriniń qatysýymen Konstıtýsııanyń barlyq novellalary boıynsha aqparattyq-túsindirý jumystary júıeli túrde júrgizilip jatyr», dedi Oljas Bektenov.
Premer-mınıstr birqatar memlekettik organǵa naqty mindet júktedi. Atap aıtqanda, Mádenıet jáne aqparat mınıstrligine ýákiletti qurylymdarmen birlesip, aqparattyq-túsindirý jumystaryn jalǵastyrý tapsyryldy.
Úkimet jańa Konstıtýsııany túsindirý jónindegi is-sharalar josparyn bekitti
Sonymen qatar Oqý-aǵartý mınıstrligi men Ǵylym jáne joǵary bilim mınıstrligine halyqtyń quqyqtyq saýattylyǵyn arttyrýǵa arnalǵan keshendi baǵdarlamany ázirleý mindeti qoıyldy. Bul baǵdarlama sheńberinde Konstıtýsııanyń jańa qaǵıdattary bilim berý júıesine engizilýi tıis.
«Oqý-aǵartý, Ǵylym jáne joǵary bilim mınıstrlikteri halyqtyń quqyqtyq saýattylyǵyn qalyptastyrý jónindegi keshendi baǵdarlamany ýaqtyly ázirlep, Konstıtýsııanyń tyń qaǵıdattaryn mektepter men kolledjderdiń jáne ýnıversıtetterdiń úlgilik oqý baǵdarlamalaryna engizýdi qamtamasyz etýge tıis», dedi Úkimet basshysy.
Jıynda sondaı-aq qoldanystaǵy zańnamany jańartý máselesi de kóterildi. Premer-mınıstr jańa Konstıtýsııa talaptaryna sáıkes barlyq zańdar men baǵdarlamalyq qujattardy qaıta qaraý qajettigin atap ótti.
«Jańa Konstıtýsııa normalaryn eskere otyryp, belgilengen merzimderde qoldanystaǵy zańnamaǵa keshendi taldaý júrgizip, barlyq zańdar men baǵdarlamalyq qujattardy ózektendirý jumystaryn aıaqtaý qajet. Barlyq ortalyq jáne jergilikti atqarýshy memlekettik organdarǵa Is-sharalar josparyn júzege asyrýdy tapsyramyn», dedi Oljas Bektenov.
Osylaısha Úkimet Konstıtýsııa normalaryn qoǵamǵa keńinen túsindirýmen qatar, quqyqtyq mádenıetti arttyrý jáne zańnamany jańǵyrtý jumystaryn qatar júrgizýdi kózdep otyr.
Jańa Konstıtýsııa – jastardyń el damýyna naqty yqpal etý kezeńin bastaıdy
