Foto: Polisia.kz
Alaıaqtar memlekettik qyzmetterge degen senimdi paıdalanyp, azamattardyń jeke derekterin ıemdenýge tyrysady. Jábirlenýshilerdiń uıaly telefondaryna memlekettik baılanys ortalyǵynyń nómirine uqsas nómirden habarlama kelip túsedi. Onda sizge ákimshilik aıyppul salynǵany týraly jalǵan aqparat beriledi jáne ony tekserý nemese tóleý úshin silteme usynylady.
Silteme resmı portalǵa uqsas bolýy múmkin, alaıda bul – jalǵan saıt. Alaıaqtar ony «eGov» portalyna uqsatyp arnaıy jasaıdy. Eń qaýiptisi – kez kelgen kólik nómirin nemese JSN engizgen kezde de júıe «aıyppul bar» degen jalǵan aqparatty kórsetýi.
Psıhologııalyq qysym tásili – azamattardy shuǵyl sheshim qabyldaýǵa ıtermeleýge baǵyttalǵan. Jalǵan saıtta «tóleý» batyrmasyn basqan jaǵdaıda, paıdalanýshydan bank kartasynyń tolyq derekterin engizý suralady. Osy derekterdi alǵan sátte alaıaqtar qarjyny zańsyz sheship alýy múmkin.
Mamandardyń aıtýynsha, alaıaqtyqtyń basty belgisi – qate derek engizilgenine qaramastan, júıeniń árdaıym «aıyppul bar» dep kórsetýi. Bul – qoldanýshyny adastyryp, senim qalyptastyrýǵa baǵyttalǵan tásil.
Quqyq qorǵaý organdary azamattarǵa myna talaptardy qatań saqtaýǵa keńes beredi:
- kúmándi siltemelerdi ashpaý;
- jeke jáne bank derekterin bógde saıttarǵa engizbeý;
- belgisiz jáne shuǵyl áreket talap etetin habarlamalarǵa senbeý;
- aıyppuldardy tek resmı jáne senimdi platformalar arqyly tekserý.
Sondaı-aq, memlekettik organdar eshqashan SMS arqyly banktik derekterdi suramaıtyny eskertiledi.
Polısııa azamattardy sıfrlyq qaýipsizdik talaptaryn saqtaýǵa shaqyrady. Saqtyq – alaıaqtyqtyń aldyn alýdyń eń tıimdi joly.
Internet-alaıaqtyqqa qarsy naqty nátıje: Jetisýda 600 myń teńge qaıtaryldy
