Qujat ǵylymı áriptestikti damytýǵa, ýnıversıtettiń ǵylymı jáne zerthanalyq bazasyn nyǵaıtýǵa, sondaı-aq tehnologııalar men ınnovasııalar salasyndaǵy ózara is-qımyldy keńeıtýge baǵyttalǵan. EUÝ atynan memorandýmǵa akademııalyq máseleler jónindegi prorektor Ardaq Beısenbaı qol qoıdy.
Kelisimge sáıkes, taraptar birqatar baǵyt boıynsha yntymaqtastyqty damytýǵa nıetti. Atap aıtqanda, zamanaýı ǵylymı jabdyqtardy satyp alý, konsýltasııalyq-saraptamalyq qoldaý kórsetý, semınarlar men vorkshoptar ótkizý, sondaı-aq mamandandyrylǵan trenıngter uıymdastyrý kózdelgen.
«Qujatqa qol qoıý Qazaqstan men Japonııa arasyndaǵy ǵylym, bilim jáne joǵary tehnologııalar salasyndaǵy yntymaqtastyqty tereńdetý baǵytyn aıqyndaıdy. Jasalǵan memorandým EUÝ úshin zertteý ınfraqurylymyn jańǵyrtýǵa, quzyretter almasýǵa, zamanaýı analıtıkalyq sheshimderdi engizýge jáne joǵary bilikti mamandar daıarlaýǵa múmkindik beredi. Sonymen qatar bul ýnıversıtet úshin halyqaralyq yntymaqtastyqty keńeıtý jáne óz pozısııasyn nyǵaıtý jolyndaǵy mańyzdy qadam», dep atap ótti prorektor Ardaq Beısenbaı.
JEOL Ltd. – ǵylymı-ólsheý jáne zertteý júıeleri salasyndaǵy halyqaralyq kóshbasshy kompanııa, al Interactive Corporation – atalǵan kompanııanyń TMD elderindegi resmı dıstrıbıýtory.
Memorandýmǵa qol qoıý EUÝ delegasııasynyń Japonııaǵa jumys sapary aıasynda ótti. Delegasııa quramynda akademııalyq máseleler jónindegi prorektor Ardaq Beısenbaı, Fızıka-tehnıkalyq ǵylymdar ınstıtýtynyń dırektory Erik Nurmoldın, sondaı-aq Iаdrolyq fızıka, jańa materıaldar jáne tehnologııalar halyqaralyq kafedrasynyń meńgerýshisi Qasym Jumadilov boldy.
Sapar barysynda ýnıversıtet ókilderi Tokıo ýnıversıteti men Sýkýba ýnıversıtetine baryp, professor-oqytýshylar quramymen kezdesýler ótkizdi.
Taraptar aldaǵy yntymaqtastyqtyń perspektıvalaryn, sonyń ishinde birlesken ǵylymı jobalardy júzege asyrý, zertteý zerthanalaryn ashý jáne halyqaralyq bilim berý baǵdarlamalaryn iske qosý máselelerin talqylady. Sonymen qatar stýdentter men oqytýshylardyń akademııalyq utqyrlyǵy, onyń ishinde taǵylymdamalar men almasý baǵdarlamalaryna erekshe nazar aýdaryldy.
Kezdesýge qatysýshylar ǵylymdy damytý, joǵary bilikti mamandar daıarlaý jáne ozyq tehnologııalardy ekonomıkaǵa engizý úshin birlesken zertteýlerdiń mańyzdylyǵyn atap ótti.
Jumys sapary men memorandýmǵa qol qoıý Eýrazııa ulttyq ýnıversıtetiniń halyqaralyq yntymaqtastyǵyn nyǵaıtý jáne onyń ǵylymı-bilim berý múmkindikterin keńeıtý jolyndaǵy mańyzdy qadam boldy.
