Sýretterdi túsirgen – Jumabaı Musabek
Osy ýaqytqa deıin jetisýlyqtarǵa Astanaǵa jetý ońaıǵa soqpaıtyn. Kópshilik aldymen Almatyǵa qatynap, odan ári poıyzǵa otyrýǵa májbúr edi. Bul qosymsha ýaqyt pen shyǵyndy talap etetin. Endi jańa baǵyttyń iske qosylýymen jol qysqaryp, qatynas jeńildedi, al turǵyndardyń múmkindigi keńeıdi. Sodan da bolar kópshilik poıyzdy erekshe yqylaspen qarsy aldy.
Saltanatty is-sharada Taldyqorǵan qalasynyń ákimi Ernat Bázil bul bastamanyń mańyzdylyǵyna aıryqsha toqtaldy.
«Jańa temirjol jelisi – kólik ınfraqurylymyn jaqsartý ǵana emes, sonymen birge aımaqtyń ekonomıkalyq áleýetin arttyryp, týrızmniń damýyna serpin beretin mańyzdy joba. Bul – turǵyndardyń turmys sapasyn arttyryp, aımaqtyń ınvestısııalyq tartymdylyǵyn kúsheıtetin, bolashaqqa bastaıtyn jarqyn jol. Osy ıgilikti iske úles qosqan Parlament depýtattaryna, Kólik mınıstrligine jáne «Qazaqstan temirjoly» kompanııasyna alǵys aıtamyz», dedi E.Bázil.
Odan bólek, osy ıgilikti istiń basy-qasynda júrgen Májilis depýtaty Naýryz Saılaýbaı, Temirjol jáne sý kóligi komıteti tóraǵasynyń orynbasary Eldos Nestaı, «Jolaýshylar tasymaly» AQ basqarma tóraǵasy Dııar Núsipqojanov ta aqjarma tilegin arnady.
«Jańa baǵyt turǵyndardyń ótinishi negizinde qolǵa alyndy. Poıyzdar ázirge kúnara júredi, sóıtip, elorda men Jetisý oblysy arasynda turaqty ári yńǵaıly qatynas jandandy. Jyljymaly quramdy jańartý men marshrýttyq jelini keńeıtý kólik salasynyń strategııalyq mindetterin júzege asyrýdaǵy basym baǵyttardyń biri bolyp qala beredi», dedi D.Núsipqojanov.
Oblys ákimi baspasóz qyzmetiniń málimetinshe, munda jolaýshylardyń jaılylyǵyna erekshe kóńil bólingen. Poıyz baǵytynda klımatty baqylaý, aýany zalalsyzdandyrý, beınebaqylaý jáne órt qaýipsizdigi júıelerimen jabdyqtalǵan zamanaýı «45» serııaly (RWS Wagon) vagondar paıdalanylady Jolaýshylar úshin Wi-Fi, USB porttary, rozetkalar, yńǵaıly uıyqtaıtyn oryndar qarastyrylǵan.
Taldyqorǵan turǵyndarynyń da qýanyshy erekshe. Olar endi Astanaǵa sapar shegý áldeqaıda jeńil ári jaıly bolatynyn aıtady. Solardyń biri – Balqash qalasyna barýǵa bılet alǵan Beıbit Arsambaev pen Jumaǵúl Aqbaevanyń otbasy.
«Biz Balqash qalasyna bara jatyrmyz, onda nemerelerimiz turady. Buryn Úshtóbe qalasyna baryp poıyzǵa otyryp, Aqtoǵaıda «Semeı – Astana» baǵytyna qaıta minýge týra keletin. Endi Balqashqa tikeleı bara alamyz, soǵan óte qýanyshtymyz. Ásirese biz sııaqty zeınetkerlerge, jalpy barlyq qart adamǵa bul óte yńǵaıly. Osy baǵytty iske qosýǵa atsalysqan barsha jandarǵa alǵysymyzdy bildiremiz. Aldaǵy ýaqytta eki vagon emes, tórt-bes vagon bolsa deımiz», dedi olar.
Jalpy, sarapshylar temirjol qatynasynyń iske qosylýy óńirdiń damýyna serpin berip, ekonomıkalyq baılanystardy nyǵaıtyp, Jetisý oblysynyń týrıstik tartymdylyǵyn arttyrady dep senedi.
Eske salsaq, «Astana–Taldyqorǵan» temirjol baǵyty kúnara qatynap, elorda men Jetisý oblysy arasyndaǵy turaqty baılanysty qamtamasyz etedi. Astanadan vagondar №122/121 «Nurly jol – Semeı» poıyzynyń quramynda júrip, Aqtoǵaı stansasynda №631/632 «Aqtoǵaı – Taldyqorǵan» poıyzyna tirkeledi, odan ári Taldyqorǵan stansasyna deıin jalǵasady.
«28 saǵat jol júrý uzaq ýaqyt sekildi kóringenimen, burynǵydaı áýre-sarsańǵa salmaıdy. Máselen, men keshe tańerteń poıyzǵa otyryp, búgin túste úıime jettim. Eseptep qarasaq, «Astana – Almaty» baǵytyna da shamamen sol ýaqyt ketedi eken. Buǵan qosa, Almatydan Taldyqorǵanǵa taksı tabý, kútý jáne jol júrý ýaqytyn qosý kerek. Al munda esh qıyndyqsyz, jaıly jaǵdaıda týǵan qalańa jetýge bolady. Bılet baǵalary da tıimdi: plaskart 16 myń teńge, kýpe 21 myń teńge. Qaltaǵa salmaq salmaıdy», deıdi jolaýshy Serik Baıturǵanov.
Astanadan («Nurly jol») jóneltý – taq kúnderi saǵat 06.32-de, Taldyqorǵanǵa kelý – 11.05-te. Qaıtar baǵytta Taldyqorǵannan jup kúnderi saǵat 12.15-te shyǵyp, Astanaǵa saǵat 19.30-da jetedi. Jol júrý ýaqyty – shamamen 28 saǵat.
Shyn máninde temirjol – el damýynyń kúretamyry. Ol tek jolaýshy tasymalyn qamtamasyz etip qoımaı, óńirler arasyndaǵy baılanysty nyǵaıtady, saýda-sattyqty jandandyrady, jańa jumys oryndarynyń ashylýyna yqpal etedi. Ásirese Jetisý sekildi áleýeti zor óńir úshin mundaı baǵyttardyń mańyzy úlken. Endi Taldyqorǵan tek oblys ortalyǵy ǵana emes, iri kólik toraptarynyń birine aınalýǵa qadam jasady.
Jetisý oblysy
