Keshe Senatta saltanatty jıyn ótip, onda jańa Konstıtýsııaǵa baılanysty respýblıkalyq referendýmnyń qorytyndysy talqylandy. Palata tóraǵasy atalǵan referendým shyn máninde tarıhı oqıǵa bolǵanyn aıtty. Sondaı-aq ol daýys bergen azamattardyń 87 paıyzdan astamy Prezıdent jarııalaǵan konstıtýsııalyq reformany qoldaǵanyn, sonyń nátıjesinde elimizdiń jańa Ata zańy qabyldanǵanyn atap ótti. Bul – táýelsiz Qazaqstannyń damýy jolyndaǵy mańyzdy qadam.
M.Áshimbaev konstıtýsııalyq reforma Memleket basshysy bastamashy bolǵan aýqymdy jańǵyrtýlardyń dáıekti jalǵasy ekenine toqtaldy. Jańa Konstıtýsııa qazirgi zaman talaptaryna saı ekeni, memlekettiligimizdiń ǵasyrlar boıy qalyptasqan damý tarıhynyń jarqyn kórinisi sanalatyny da áńgimege arqaý boldy.
«Prezıdent Qasym-Jomart Toqaevtyń bastamasymen júzege asyrylǵan konstıtýsııalyq reforma el damýynyń jańa kezeńine jol ashty. Qabyldanǵan Ata zań saıası júıeni sapalyq turǵydan jańa deńgeıge kóterýge baǵyttalǵan. Sondaı-aq memleket pen qoǵam arasyndaǵy ózara senimdi nyǵaıtýdyń tıimdi tetikteri aıqyndalyp, damýdyń jańa paradıgmasy qalyptasty. Konstıtýsııada azamattardyń quqyqtary men bostandyqtaryn qorǵaý basym mindet retinde belgilengenin erekshe atap ótken jón. Bılik tarmaqtary arasyndaǵy tepe-teńdikti qamtamasyz etetin normalar da qarastyryldy. Jalpy, jańa Konstıtýsııa elimizdiń uzaqmerzimdi ári nátıjeli damýynyń berik quqyqtyq jáne saıası negizin qalady. Bul – Qazaqstannyń odan ári ósip-órkendeýi úshin asa mańyzdy qadam», dedi Senat tóraǵasy.
Is-sharada jańa Ata zań Ádiletti Qazaqstan ıdeıasyn tolyq iske asyrýdyń quqyqtyq negizin bekite túskenine nazar aýdaryldy. Sondaı-aq adam quqyqtary men bostandyqtaryn memlekettiń eń joǵary qundylyǵy retinde aıqyndaý osy reforma aıasyndaǵy asa mańyzdy tujyrymdamalyq ózgeristerdiń biri bolǵany aıtyldy.
«Eń bastysy – qoǵam konstıtýsııalyq reformaǵa beıjaı qaraǵan joq. Azamattardyń basym kópshiligi el damýynyń berik negizine aınalatyn jańa Konstıtýsııany qoldady. Referendým nátıjeleri halyqtyń el bolashaǵyna jaýapkershilikpen qaraıtynyn kórsetti. Sondaı-aq Memleket basshysynyń reformalaryna azamattardyń senimi joǵary ekenin taǵy bir márte pash etti. Qazir aldymyzda jańa Konstıtýsııadan týyndaıtyn aýqymdy mindetter tur. Basty maqsat – Prezıdentimizdiń bas-tamasymen qolǵa alynǵan reformalardy sapaly júrgizý, jańa Ata zańda aıqyndalǵan qaǵıdattardy naqty mazmunmen tolyqtyrý jáne tıisti zańdar qabyldaý arqyly Ádiletti Qazaqstan qalyptastyrý ıdeıasyn iske asyrý. Bul – depýtattar úshin ortaq mindet, ortaq jaýapkershilik», dedi M.Áshimbaev.
Sonymen qatar Senat tóraǵasy Prezıdent Jarlyǵymen Qazaqstan Respýblıkasynyń memlekettiligi men Egemendigin nyǵaıtý isindegi eseli eńbegi, belsendi qoǵamdyq jáne minsiz memlekettik qyzmeti, eldiń áleýmettik-ekonomıkalyq, mádenı damýyna, ultaralyq kelisimdi nyǵaıtýǵa qosqan eleýli úlesi úshin marapattalǵan birqatar senator men Palata Apparatynyń qyzmetkerlerine memlekettik nagradalardy tapsyrdy.
Atap aıtqanda, senatorlar Sultanbek Mákejanov pen Nurtóre Júsip III dárejeli «Barys» ordenimen nagradtaldy. Palata depýtattary Ǵalıasqar Sarybaev pen Olga Býlavkınaǵa «Parasat» ordeni tabystaldy. Senator Rýslan Rústemov, Senat Apparatynyń basshysy Maksım Spotkaı, Apparat basshysynyń orynbasary Adaı Baımuqanov, bólim basshysy Baqytgúl Tóleýova, baspasóz qyzmeti basshysynyń orynbasary Elaman Qońyr «Qurmet» ordenimen marapattaldy. Budan basqa, Apparattyń birqatar qyzmetkerine «Eren eńbegi úshin» medali men Prezıdenttiń Alǵyshaty tapsyryldy.
