Sýret: senate.parlam.kz
Kóshpeli otyrys barysynda gıdrotehnıkalyq qurylystyń jaı-kúıine, sondaı-aq kópirlerdi, bógetter men tonnelderdi yqtımal qaýip-qaterler men tótenshe jaǵdaılardan qorǵaý máselelerine basa nazar aýdaryldy. Qatysýshylar nysannyń aǵymdaǵy paıdalanylý barysymen, onyń tehnıkalyq sıpattamalarymen, turaqty jumys isteýin qamtamasyz etý barysynda qabyldanyp jatqan sharalarmen tanysty.
Komıtet tóraǵasy Andreı Lýkın asa mańyzdy ınfraqurylym nysandarynyń qaýipsizdigin qamtamasyz etý máseleleri turaqty baqylaýda ekenin atap ótti.
«Gıdrotehnıkalyq qurylystardyń jaı-kúıine jáne tótenshe jaǵdaılardyń, sonyń ishinde sý tasqyny kezeńindegi qaýipterdiń aldyn alý sharalaryna erekshe kóńil bólý mańyzdy. Bul rette mundaı nysandardyń tozý deńgeıiniń joǵary ekenin eskere otyryp, olardy jańǵyrtý men jóndeýge júıeli tásildi qamtamasyz etý qajet. Vedomstvoaralyq tıimdi is-qımyldy jolǵa qoıý jáne týyndaıtyn táýekelderge jedel den qoıýǵa, mańyzdy ınfraqurylymnyń turaqty jumysyn qamtamasyz etýge múmkindik beretin zamanaýı monıtorıng mehanızmderin engizýdiń mańyzy zor», dedi ol.
Sondaı-aq talqylaý barysynda sý tasqyny jaǵdaıy jáne tótenshe jaǵdaıdyń aldyn alý boıynsha qabyldanyp jatqan sharalar qaraldy. Qazirgi ýaqytta elimizde gıdrologııalyq jaǵdaıǵa turaqty monıtorıng júrgizilip jatyr, al sý tasqynyna qarsy is-sharalar ýákiletti organdardyń baqylaýynda.
Kóshpeli jıynǵa Tótenshe jaǵdaılar, Sý resýrstary jáne ırrıgasııa mınıstrlikteriniń, Astana qalasy ákimdiginiń, basqa da múddeli memlekettik organdardyń ókilderi qatysty.
Kezdesý qorytyndysynda mańyzdy ınfraqurylym qaýipsizdigin qamtamasyz etý júıesin odan ári jetildirý, sonyń ishinde vedomstvoaralyq is-qımyl mehanızmderin damytý, aldyn alý sharalaryn kúsheıtý qajettigi atap ótildi.
