Kaspıı teńiziniń túbimen ótetin kabel jelisiniń qurylysy 380 shaqyrymdy qamtıdy. Qurylys jumystary aıaqtalǵan jaǵdaıda onyń ótkizý qabileti 400 Tbıt/s-qa deıin jetpek. Joba Qazaqstan men Ázerbaıjannyń ulttyq telekom operatorlary birlesip qurǵan CaspiLink B.V. kompanııasy arqyly júzege asyrylady.
Mınıstrliktiń málimetinshe, qazirgi tańda Qazaqstan Eýropa men Azııa arasyndaǵy ınternet-trafık tranzıtinde shamamen 1,5 paıyz úleske ıe. 2027 jylǵa qaraı bul kórsetkishti 5 paıyzǵa deıin arttyrý josparlanyp otyr. Joba halyqaralyq baılanys ótkizý qabiletin 54 paıyzǵa deıin ulǵaıtýǵa múmkindik beredi.
Jobany qarjylandyrý «Qazaqtelekomnyń» óz qarajaty esebinen júzege asyrylyp jatyr. Alaıda kelisimderdiń qupııalylyq sharttaryna sáıkes, negizgi qarjylyq model, kútiletin tabys, ótelý merzimi jáne ishki kiristilik kórsetkishteri de jarııa etilmeıdi. CaspiLink B.V. tabysy Qazaqstan, Ortalyq Azııa, Qytaı jáne Eýropa arasyndaǵy ınternet-trafık tranzıtinen qalyptasady.
Transkaspıılik joba Qazaqstannyń sıfrlyq ınfraqurylymyn damytýdaǵy jáne halyqaralyq ınternet dálizin keńeıtýdegi strategııalyq mańyzdy bastamalardyń biri bolyp sanalady.
