Foto: Qorǵanys mınıstrligi
Atalǵan mereke halyqaralyq dástúrge negizdelgen. Ol IýNESKO bastamasymen bekitilip, álemde Dúnıejúzilik kitap jáne avtorlyq quqyq kúni retinde atalyp ótedi. Qazaqstanda bul data Memleket basshysynyń tapsyrmasymen engizilip, alǵash ret 2025 jyly mádenı-aǵartýshylyq kún retinde belgilendi.
Qarýly Kúshterde kitap oqý mádenıetin damytý júıeli túrde júzege asyrylyp keledi. Qazirgi tańda áskerı bólimder men mekemelerde 322 kitaphana jumys isteıdi. Olardyń qorynda 52 myńnan astam kórkem ádebıet jáne 198 myńnan asa oqý basylymy bar.
Ulttyq áskerı-patrıottyq ortalyǵy áskerı-ǵylymı kitaphanasynyń meńgerýshisi Oksana Áljanovanyń aıtýynsha, kitaphana qorynda otandyq avtorlarmen qatar áskerı jazýshylar men ǵalymdardyń qundy eńbekteri jınaqtalǵan. Kitaphana 2020 jyldyń jeltoqsanynda ashylǵan, búginde onda 7 myńnan astam kitap bar. Qor negizinen qaıyrymdylyq aksııalary men áriptes kitaphanalardyń qoldaýy arqyly tolyqtyrylǵan.
Tek bıyldyń ózinde áskerı qyzmetshilerge 48 myńnan astam kitap berilgen. Bul sarbazdar arasynda kitap oqýǵa degen qyzyǵýshylyqtyń joǵary ekenin kórsetedi.
Kitaphana qory turaqty túrde jańartylyp otyrady. Bul iske demeýshiler, baspalar jáne áskerı qyzmetshilerdiń ózderi de belsendi atsalysady. Kóptegen sarbazdar jeke kitaptaryn bólim kitaphanalaryna tabystap, ortaq iske úles qosyp keledi.
Mindetti oqý normasyn engizý – tek talap emes, tárbıelik ári bilim berý jumysynyń bir bóligi. Kitap oqý oı-óristi keńeıtip, synı oılaýdy damytady jáne tulǵalyq qundylyqtardy qalyptastyrady.
Ulttyq áskerı-patrıottyq ortalyǵynyń sarbazy Nurdos Aıtmuhametovtiń aıtýynsha, áskerı kitaphanada qyzyqty eńbekter kóp. Qazir ol aqyn Muhtar Shahanovtyń shyǵarmasyn oqyp júr. Jalpy, oǵan detektıv janry men áskerı taqyryptaǵy kitaptar unaıdy.
Aıda Balaeva: Kitap oqýǵa qyzyǵýshylyq turaqty túrde artyp keledi
Qazirgi tańda kitap – ózin-ózi damytýǵa múmkindik beretin mańyzdy qural. Al oǵan degen qyzyǵýshylyq áskerı qyzmetshilerdiń kásibı ári tulǵalyq ósýiniń ajyramas bóligine aınalyp keledi.
