Senatordyń dereginshe, búginde turǵyn úı kezeginde shamamen 61 myń jetim bala tirkelgen. Olardyń 43 myńnan astamy kámelet jasyna jetkenimen, baspana ala almaı otyr. Al aldaǵy jyldary bul kezektiń aıtarlyqtaı qysqarýy kútilmeıdi.
Eń kóp kezekte turǵandar Almaty oblysynda (shamamen 7,2 myń adam), Shyǵys Qazaqstan oblysynda (6,4 myń), Qaraǵandy oblysynda (5,9 myń), Qostanaı oblysynda (5,7 myń) jáne Aqtóbe oblysynda (3 myńǵa jýyq) tirkelgen.
Bazadaǵy qatelik: Abaı oblysynda jetim balany baspanasyz qaldyrdy
Senatordyń aıtýynsha, sońǵy jyldary berilgen 60 myńǵa jýyq turǵyn úıdiń tek 7 myńy ǵana jetim balalarǵa bólingen, bul jalpy kólemniń 11,8 paıyzyn ǵana quraıdy.
Sonymen qatar, keıbir kúrdeli máseleler de bar. Atap aıtqanda, kámeletke tolmaǵan jetim balalardyń kezekte bolýyna baılanysty eresek túlekter baspana ala almaı jatady. Al kámeletke tolmaǵandar jas ereksheligine baılanysty turǵyn úı quqyǵyn paıdalana almaıdy. Nátıjesinde, keıbir jaǵdaılarda turǵyn úıler basqa sanattaǵy azamattarǵa berilip jatady.
Sondaı-aq óńirlerde zańsyz turý jaǵdaılary, aqparattyq júıelerdegi derekterdiń joǵalýy sııaqty olqylyqtar da anyqtalǵan.
Senatordyń pikirinshe, bul máseleler jergilikti atqarýshy organdardyń baqylaýynyń álsizdigin jáne turǵyn úı saıasatynyń jetkilikti deńgeıde oryndalmaı otyrǵanyn kórsetedi.
Osyǵan baılanysty ol jetim balalardy baspanamen qamtamasyz etý boıynsha naqty kórsetkishteri bar keshendi jol kartasyn ázirleýdi, sondaı-aq turǵyn úı bólýdiń ashyqtyǵyn arttyrý úshin sıfrlyq júıelerdi (Smart Data Ukimet, kezekte.kz jáne basqa platformalar) kúsheıtýdi usyndy.
Sonymen birge Andreı Lýkın jetim balalardyń turǵyn úı alý quqyǵyn zańmen bekitip, olarǵa basymdyq berýdi usyndy. Bul bastamany Eńbek jáne halyqty áleýmettik qorǵaý, Oqý-aǵartý, Ádilet mınıstrlikteri birlesip qarastyrýy qajet ekenin aıtty.
