Memleket basshysy Týnıs Prezıdentine kóńil aıtý jedelhatyn joldady

ASTANA. 27 maýsym. Elbasy Týnıs Respýblıkasynyń Prezıdenti Bedjı Kaıd As-Sebsıge Sýs qalasynda bolǵan terrorlyq aktige baılanysty kóńil aıtý jedelhatyn joldady. Bul týraly akorda.kz habarlady. Kóńil aıtý jedelhatynda Memleket basshysynyń Sýs qalasynda bolǵan terrorıstik akt saldarynan kóptegen Týnıs jáne shetel azamattarynyń qaza tapqany týraly sýyt habardy zor kúızelispen qabyldaǵany atap ótilgen. «Qazaqstan barsha álemniń beıbitshiligi men qaýipsizdigine eleýli qaýip tóndirip otyrǵan halyqaralyq ekstremızm men terrorızmdi úzildi-kesildi aıyptaıdy», – delingen jedelhatta. Nursultan Nazarbaev Qazaqstan halqynyń jáne jeke óziniń atynan qaza bolǵandardyń týystary men jaqyndaryna, sondaı-aq, barsha Týnıs Respýblıkasynyń halqyna kóńil aıtyp, zardap shekkenderdiń tezirek saýyǵyp ketýine tilektestik bildirdi. Talǵat Raıymbek. Derek, sýret: akorda.kz.