Foto: Aqorda
Memleket basshysy – Qazaqstan Qarýly Kúshteri Joǵarǵy Bas Qolbasshysy Qasym-Jomart Toqaev sardarlar men sarbazdardy, jıynǵa qatysýshylardy Otan qorǵaýshy kúnimen jáne Jeńis kúnimen quttyqtady.
«Qos merekeniń mán-mazmuny – úndes, taǵylymy – ortaq. Osy meıramdarda elimizdiń erlik dástúri keńinen dáripteledi. Biz bul kúnderi jurtymyzǵa qorǵan bolyp júrgen erlerge qurmet kórsetemiz. Sondaı-aq surapyl soǵysta Otan úshin ot keshken batyrlardyń rýhyna taǵzym etemiz. Qazaq – shekarasyn aq naızanyń ushymen, aq bilektiń kúshimen bekemdegen qaharman halyq, erjúrek ult. Batyr babalarymyz el taǵdyry synǵa túsken sátte bir Týdyń astyna jınalǵan. Birligin nyǵaıtyp, jurtyn jaýdan qorǵaǵan. Baıtaq dalany kózdiń qarashyǵyndaı saqtap, urpaqqa amanat etken. Osy amanatqa adal bolý – bizdiń qasterli boryshymyz. Birtutas Qazaqstan halqy muny jaqsy túsinedi. Naýryz aıyndaǵy konstıtýsııalyq reforma – sonyń aıqyn dáleli. Saıası naýqan kezinde biz eń aldymen óskeleń urpaq aldyndaǵy jaýapkershilikti tereń sezine otyryp, tarıhı tańdaýymyzdy jasadyq. Bárimiz bir el bolyp, jańa Konstıtýsııany qabyldadyq. Muny ult bolashaǵyna tikeleı yqpal etetin asa mańyzdy sheshim desek, qate bolmaıdy», dedi Prezıdent.
Qasym-Jomart Toqaev Konstıtýsııa memlekettigimiz ben egemendigimizdiń myzǵymas kepili ekenin atap ótti.
«Bas qujatta halqymyzdyń múddesi, maqsat-muraty men biregeı qundylyqtary kórinis tapty. Jańa Ata zańda Egemendik pen Táýelsizdikti qorǵaý, azamattardyń quqyqtary men bostandyqtaryn saqtaý, halqymyzdyń ál-aýqatyn arttyrý, birligin kúsheıtý buljymas qaǵıdat retinde aıqyndaldy. Adam kapıtalyn, bilim-ǵylymdy, ınnovasııany damytý memleket qyzmetiniń strategııalyq baǵyty retinde bekitildi. Osylaısha, biz Zań men tártip ústemdik quratyn, barshaǵa birdeı múmkindik beriletin, Ádiletti, Qýatty, О́rkenıetti memleket qurý jolyna bet aldyq. Qazaqstannyń maqsaty – bıik, baǵdary – aıqyn. Yrysty yntymaǵymyzdy jáne berekeli birligimizdi saqtaı bilsek, osy muratymyzǵa jetemiz», dedi Memleket basshysy.
