Foto: Aqorda
Prezıdenttiń aıtýynsha, elimiz TMD ishindegi BUU bitimgerlik mıssııasyn derbes oryndaý mártebesine ıe bolǵan jalǵyz memleket.
«Búginde Qazaqstannyń aıbyndy armııasy batyr babalardyń dańqty jolyn laıyqty jalǵastyryp keledi. Saıypqyran sarbazdarymyz – qasıetti Táýelsizdigimizdiń berik qalqany. Olar elimizdiń tynyshtyǵyn, jerimizdiń tutastyǵyn qas qaqpaı kúzetip tur. Kúshtik qurylymdar zań ústemdigin, qoǵamdyq tártip pen ulttyq qaýipsizdikti qamtamasyz etýde. Qutqarýshylar qaterden qaımyqpaı azamattardyń amandyǵy úshin tynymsyz eńbek etip júr. Jaýyngerlerimiz kúrdeli mindetterdi tabysty oryndap, halyqaralyq turaqtylyqty nyǵaıtý isine de zor úles qosýda. Qazaqstan – Birikken Ulttar Uıymynyń bitimgerlik mıssııasyn derbes oryndaý mártebesine ıe bolǵan Táýelsiz Memleketter Dostastyǵy ishindegi jalǵyz memleket. Bul álem elderiniń qazaq armııasyna degen senimi joǵary ekenin kórsetedi», dedi Memleket basshysy.
Memleket basshysy: Surapyl soǵysta Otan úshin ot keshken batyrlardyń rýhyna taǵzym etemiz
Qasym-Jomart Toqaev sarbazdarymyz arnaıy jasaqtar men kúshtik qurylymdar arasyndaǵy jahandyq dodalarda tamasha jetistikke qol jetkizip júrgenin aıtty.
«Bıyl Dýbaıda ótken aýqymdy halyqaralyq jarysqa elimizdiń bes komandasy qatysyp, júldemen oraldy. Baıraqty básekede birinshi jáne ekinshi oryndy Qazaqstan quramasy enshiledi. Ásirese, áıelder arasynda top jarǵan «Tomırıs» komandasynyń qarym-qabiletine jahan jurty tánti boldy. Munyń bári de – rýhy myqty, qajyr-qaıraty mol, Otan aldyndaǵy antqa adal sarbazdarymyzdyń eren eńbeginiń jemisi ekeni aıqyn. Memleket osyndaı aıbyndy jaýyngerlerimizdi qashanda qoldaıdy. Bul – eń aldymen, el múddesi úshin, ıaǵnı, ultymyzdyń keleshegi úshin asa mańyzdy mindet», dedi Prezıdent.
