foto: pixabay
16 jastaǵy stýdenttiń ákesi Rýslan Seısenbaevtyń aıtýynsha, joǵary kýrs stýdentteri birinshi kýrsqa jańadan kelgenderdi jataqhananyń fıtnes-zalyna aparyp, qorlaǵan ári soqqyǵa jyqqan.
Ákesiniń sózinshe, jasóspirim sol jerde jan tapsyrǵan. Alaıda jedel járdem der kezinde shaqyrylmaǵan. Onyń ornyna stýdentter marqumdy bólmesine aparyp, keıin vahterge túsirip ketken kórinedi.
Týystary bul jaǵdaıdy jasyrý áreketi bolǵanyn aıtyp, jataqhanada álimjettik burynnan jalǵasyp kele jatqanyn málimdedi.
Almatydaǵy stýdenttiń ólimi: Qaıǵyly oqıǵaǵa ádiletsiz baǵalaý sebep boldy ma?
Al kolledj basshylyǵy oqý ornynda eshqandaı álimjettik bolmaǵanyn alǵa tartty. Mekeme ákimshiligi stýdentterdiń tártibin baqylamaǵan qyzmetkerlerdiń jumystan bosatylǵanyn habarlady. Qazir kolledj ishinde qyzmettik tekseris júrip jatyr, al quqyq qorǵaý organdary bólek tergeý bastaǵan.
Kolledj dırektorynyń orynbasary Gúlmıra О́teýlıeva stýdentter arasynda aqsha talap etý nemese júıeli qysym kórsetý bolmaǵanyn aıtty. Onyń sózinshe, kúdiktiler marqumnyń «qurmetsizdik tanytqanyn» aıtyp, tek bir ret judyryqpen urǵandaryn jetkizgen.
Polısııa atalǵan derek boıynsha «Densaýlyqqa qasaqana aýyr zııan keltirý» baby boıynsha qylmystyq is qozǵady. Bir stýdent qamaýǵa alynǵan. Alaıda marqumnyń týystary qaýipsizdikke salǵyrt qaraǵan kolledj qyzmetkerlerin de jaýapqa tartýdy talap etip otyr.
Eske salaıyq, Abaı atyndaǵy Qazaq ulttyq pedagogıkalyq ýnıversıtetiniń 1-kýrs stýdenti 8-qabattan qulap, qaza tapty. Al Pavlodarda qatarlastarynan aqsha bopsalamaq bolǵan 2 stýdent ustaldy.
