Zań jobasynda radıoaktıvti qaldyqtardy basqarýdyń quqyqtyq negizderi, memlekettik baqylaý men lısenzııalaý tártibi, sondaı-aq radıoaktıvti qaldyqtardy esepke alý jáne kómý máseleleri aıqyndalyp otyr.
Zań jobasynda radıoaktıvti qaldyqtardy synyptaý belgilenedi. Olardyń shyǵý kózi, agregattyq jaı-kúıi, belsendilik deńgeıi, radıonýklıdterdiń jartylaı ydyraý kezeńi olardy synyptaýǵa negiz boldy. Buǵan qosa radıoaktıvti qaldyqtarmen jumys isteý salasyndaǵy qyzmetti júzege asyrý sharttary men tártibi reglamentteldi.
Qazaqstan men Qytaı radıoaktıvti qaldyqtardy ótkizbeýge qatysty zańdy qabyldady
Sonymen qatar zań jobasynda radıoaktıvti qaldyqtarmen jumys isteý jónindegi ulttyq operator ınstıtýtyn qurý qarastyrylǵan. Ol radıoaktıvti qaldyqtardy jınaý, tasymaldaý, qaıta óńdeý, kómý jáne uzaq merzimdi monıtorıng júrgizý sııaqty negizgi fýnksııalardy atqarady. Halyqaralyq tájirıbe mundaı operatorlardyń salany qaýipsiz ári ortalyqtandyrylǵan túrde basqarýǵa múmkindik beretinin kórsetip otyr.
Sondaı-aq depýtattar negizgi anyqtamalardy naqtylaýǵa baǵyttalǵan túzetýler engizdi, «radıoaktıvti qaldyqtar» uǵymy oǵan jabdyqtardy, materıaldardy, sondaı-aq taý-ken óndirisi qyzmetiniń qaldyqtaryn qosa otyryp keńeıtildi, radıoaktıvti qaldyqtar tizilimin jáne jumys isteý obektileriniń kadastryn júrgizý tártibi engiziledi, bastapqy esepke alý mindeti bekitiledi, sondaı-aq radıoaktıvti qaldyqtardy túzýshilerdiń jaýapkershiligi naqtylandy.
