Foto: Gov.kz
«Sırıýs» Qazaqstan jobasy daryndy balalarmen jumys isteý júıesin damytýǵa jáne olardyń oqýy men damýyna arnalǵan zamanaýı bilim berý ortasyn qalyptastyrýǵa baǵyttalǵan. Jobanyń negizgi mindeti – bul daryndy balalardy erte anyqtap, olardy ǵylym, tehnologııa jáne jobalyq qyzmet boıynsha tereńdetilgen baǵdarlamalar arqyly júıeli damytý. Bul Qazaqstandaǵy talantty oqýshylardyń turaqty ekojúıesin qalyptastyrady», dedi Qanybek Jumashev.
Komıtet tóraǵasy óz sózinde bul joba Memleket basshysynyń tapsyrmasyn oryndaý aıasynda júzege asyrylǵanyn atap ótti. Sondaı-aq joba bilim sapasyn arttyrýǵa, Qazaqstan oqýshylarynyń halyqaralyq deńgeıdegi básekege qabilettiligin kúsheıtýge baǵyttalǵanyn jetkizdi.
«Bul joba aıasynda mektep salynady. Sonymen qatar mektep janynda jyl boıy jumys isteıtin daryndy balalarǵa arnalǵan ortalyq bolady. Oqý prosesi Qazaqstannyń memlekettik standarttarymen oqytýdyń zamanaýı tásilderin úılestirý negizinde qurylady», dedi ol.
Negizgi basymdyq matematıka, jaratylystaný, ınjenerııa, jasandy ıntellekt jáne robototehnıka jáne jobalyq zertteý qyzmetterine beriledi.
«Oqý-tárbıe prosesi ulttyq mazmunda engiziledi. Máselen, «Dombyra», «Ulttyq óner», «Ulttyq sport» kýrstary, sondaı-aq «Adal azamat», «Birtutas tárbıe» baǵdarlamasy da engiziledi. Bul zamanaýı bilim men ulttyq qundylyqtardyń mádenı biregeıligin ushtastyrýǵa múmkindik beredi», dedi komıtet tóraǵasy.
Qanybek Jumashevtyń aıtýynsha, jobaǵa 80 paıyz qazaqstandyq mamandar tartylady. Sondaı-aq Reseıdiń «Sırıýs» federaldyq aýmaǵynyń biliktilik arttyrý baǵdarlamalaryn qoldanyp, pedagogterdiń halyqaralyq deńgeıdegi ozyq tájirıbelerin úılestirýge de múmkindik beredi.
«Sırıýs» jobasy elimizdegi oqýshylardyń olımpıadalarǵa, ǵylymı jobalyq konkýrstaryna, zertteý qyzmetimen aınalysýǵa da keń múmkindikter ashady dep otyrmyz. Sonymen qatar bul Qazaqstannyń barlyq óńirindegi matematıka, ınjenerııa, fızıka baǵytyndaǵy daryndy balalardy oqytýǵa jaǵdaı jasalady. «Sırıýs − Qazaqstan» jobasy Astana jáne Almaty qalalarynda júzege asyrylady. Sondaı-aq daryndy balalarmen jumys isteıtin júıeni, ınfraqurylymdy damytýǵa múmkindik beredi dep oılaımyz», dedi Qanybek Jumashev.
«Sırıýs» mektepterinde «Adal Azamat» tárbıe baǵdarlamasy oqytylady
