Grek-rım kúresinen elimizdiń quramasy (2 altyn +1 kúmis + 2 qola) jalpykomandalyq esepte ekinshi oryndy ıelendi. Jas órender Irandy (6 + 1 + 1) ǵana alǵa jiberdi. О́zbekstan men Qyrǵyzstan (1 + 3 + 4) úshinshi, tórtinshi oryndardy ózara bólisti. Balýandarymyzdyń arasynan Qýanyshbek Jańajol (51 kg) men Mıras Mahambetke (65 kg) teń keler eshkim tabylmady. Bul –Qýanyshbektiń Azııa chempıonatyndaǵy úshinshi altyny. Osyǵan deıin ol Taıland pen Vetnamda top jarǵan. Sondaı-aq byltyr Grekııada barlyq qarsylasyn erkin jeńip, álem chempıony atandy. Arystan Temirǵalı (110 kg) kúmis, Álı Almas (45 kg) pen Datka Lesbek
(48 kg) qola medalǵa qol jetkizdi. Taǵy tórt jerlesimiz jeńis tuǵyryna synyq súıem qalǵanda súrinip, besinshi oryndy qanaǵat tutty.
Qyzdar jarysynda Injý Baqqoja (46 kg) men Araılym Kópjasar (53 kg) fınalǵa deıin esh kedergisiz jetti. Biraq sheshýshi tusta ekeýi de japondardan utyldy. Injý Mıo Sasakıge jol berse, Araılym Ema Arakavadan aılasyn asyra almady. Aıanat Meınambaıǵa (49 kg) qola medal buıyrdy. Burymdylar básekesinde Qytaı (4 + 1 + 1), Japonııa (3 +1 + 3), Úndistan (2 + 3 + 5) úzdik shyqty. Elimizdiń quramasy (0 + 2 + 1) altynshy satyǵa turaqtady.
Erkin kúres sheberleriniń saıysynda 16 jasar Ádilet Rysbaı (71 kg) bas júldeni jeńip aldy. Ol ońtústikkoreıalyq Seo Djýnmın (11:0), qyrǵyzstandyq Býıvaısar Mamıshaev (11:3), tájikstandyq Ydyrys Bahromov (10:0), japonııalyq Tova Doıdy (8:1) aıqyn basymdyqpen utty. Mardan Orynbasar (60 kg) kúmis, Sabyrjan Rahatov (51 kg), Temirlan Murat (55 kg), Ádilbek Erbolatov (80 kg), Nurıslam Aıtýǵan (92 kg) qola medal aldy. Osy kórsetkishpen jerlesterimiz
(1 + 1 + 4) besinshi orynǵa taban tiredi. Alǵashqy úsh oryndy Iran (4 + 2 + 2), Úndistan (2 + 2 + 3), О́zbekstan (2 + 2 + 2) oljalady.
