Jańartylǵan №301 aýdıtorııa jobasy ýnıversıtet bitirgenderine 45 jyl tolǵan túlekterdiń qoldaýymen iske asyryldy. Olardyń qatarynda kórnekti memleket jáne qoǵam qaıratkerleri: Qaırat Mámı, Musabek Álimbekov, Zaǵıpa Balıeva jáne Qazaqstannyń quqyqtyq júıesiniń damýyna baǵa jetpes úles qosqan basqa da belgili tulǵalar bar.
Saltanatty rásimde sóz alǵan Ál-Farabı atyndaǵy QazUÝ-dyń Basqarma Tóraǵasy – Rektor Janseıit Túımebaev ýnıversıtettik dástúrler sabaqtastyǵynyń erekshe mańyzdylyǵyn atap ótti. Ýnıversıtet basshysy jyldar óte tehnologııalar men oqý baǵdarlamalary ózgergenimen, túlekterdiń shynaıy rızashylyqpen ushtasqan týǵan ýnıversıtetimen baılanysy eshqashan úzilmeıtinin aıtty. Onyń sózinshe, burynǵy stýdentterdiń kúshimen zamanaýı materıaldyq-tehnıkalyq bazany qalyptastyrý – qoǵamǵa qyzmet etýdiń eń úzdik úlgisi.
«Jańartylǵan 301-shi aýdıtorııa jańa býyn stýdentteri bilim alatyn orynǵa aınalady. Munda dárister oqylyp, pikirtalastar ótip, alǵashqy ǵylymı ıdeıalar týyndap, Qazaqstannyń bolashaq zańgerleri qalyptasady. Sondyqtan túlekterdiń jastar úshin bilimge, mamandyqqa jáne ýnıversıtet dástúrine degen qurmetke toly keńistik jasaýynyń sımvoldyq máni zor», dedi rektor.
Merekelik baǵdarlama 1996 jylǵy túlekterdiń qoldaýymen jańartylǵan №4 dáris zalynyń ashylýymen jalǵasty.
Sodan keıin is-shara qonaqtary №9 jataqhana mańynda boı kótergen Túlekter alleıasyn aralap, uly oıshyl ál-Farabı monýmentine qurmet retinde gúl shoqtaryn qoıdy.
Sondaı-aq, is-sharaǵa qatysýshylardy túrli jyldardaǵy túlekter: ál-Farabı atyndaǵy QazUÝ Dırektorlar keńesiniń tóraǵasy Qaırat Mámı, Bank ombýdsmeni Darhan Nurpeıisov, QazUÝ Zań fakýltetiniń Azamattyq quqyq, Azamattyq prosess jáne eńbek quqyǵy kafedrasy meńgerýshisiniń orynbasary, z.ǵ. k., professor Gúlmıra Nurahmetova jáne basqalar quttyqtady.
Saltanatty kún aýqymdy konserttik baǵdarlamaǵa ulasty. Túlekter stýdenttik shaqtyń ystyq estelikteri qalǵan oryndardy tamashalap, búginde álemdik deńgeıdegi zertteý ýnıversıtetine aınalǵan QazUÝ kampýsyn aralady.
