Foto: Aqorda
Qasym-Jomart Toqaev kelissóz barysynda halyqaralyq jáne aımaqtyq máseleler de nazardan tys qalmaǵanyn aıtty.
«Jahandyq geosaıası ahýaldyń ýshyǵýyna, qaqtyǵystardyń kóbeıýine bárimiz alańdap otyrmyz. Álemdegi kóptegen túıtkilge qatysty memleketterimizdiń ustanymy – uqsas. Eki el de kez kelgen shıelenis beıbit jáne dıplomatııalyq jolmen sheshilýi kerek degen qaǵıdatty qatań ustanady. Biz Birikken Ulttar Uıymy, Eýropadaǵy qaýipsizdik jáne yntymaqtastyq uıymy, basqa da halyqaralyq uıymdar aıasynda tıimdi jumys isteýge kelistik. Beıbitshilik pen turaqtylyqty qamtamasyz etýge belsene atsalysamyz dep ýaǵdalastyq. Qazaqstannyń ustanymy boıynsha barlyq elder Birikken Ulttar Uıymynyń Jarǵysyn, halyqaralyq quqyqtyń negizgi qaǵıdattaryn qatań saqtaýǵa mindetti. Qazaqstan basqa elderdiń aýmaqtyq tutastyǵyn qurmetteıdi jáne búkil álem memleketterin osy qaǵıdatqa basymdyq berýge shaqyrýda. Jalpy, eki eldiń baılanysyn bekemdeý – halyqtarymyzdyń ortaq maqsaty. Birlesken kúsh-jigerimizdiń arqasynda ózara tıimdi yntymaqtastyǵymyz jańa deńgeıge kóteriledi dep senemin. Dostyǵymyz árdaıym berik bolsyn! Qazaqstan men Kıprdiń qarym-qatynasy nyǵaıa bersin!» dedi Prezıdent.
Nıkos Hrıstodýlıdıstiń aıtýynsha, búgingi kelissózder barysynda eki el basshylary saıası jáne ekonomıkalyq salalardaǵy qarym-qatynasty odan ári ilgeriletý jolynda saıası erik-jiger tanytatyndaryn rastaǵan.
«Biz barlyq deńgeıde turaqty baılanys ornatýdyń mańyzyn atap óttik. О́ıtkeni ornyqty saıası dıalog – senimdi nyǵaıtý men naqty nátıjege qol jetkizýdiń negizgi faktory. Osy oraıda joǵary bilim, ǵylymı zertteý, mádenıet, sport, ınnovasııa, sıfrlyq basqarý jáne aqparattyq tehnologııa sekildi mańyzdy salalarda ózara túsinistik týraly birqatar memorandýmǵa qol qoıylǵany qýantady. Bul kelisimder – jaı ǵana tehnıkalyq qujattar emes, ekijaqty baılanystardyń áleýetin qurylymdyq jáne mazmundyq turǵydan jandandyrýdy kózdeıtin ortaq sheshimimizdiń aıqyn dáleli», dedi Kıpr Prezıdenti.
Eki el prezıdentteri BAQ ókilderine arnalǵan brıfıng ótkizdi
