«Astana» sýperkýbok úshin oıynda «Qaıratty» jeńdi

ASTANA. 1 naýryz. «Astana» fýtbol komandasy elimizdiń sýperkýbogy úshin ótken tartysta almatylyq «Qaırattan» basym tústi. Oıyn sońyndaǵy penaltı arqyly 3:2 esebimen jeńiske jetken elordalyqtar osylaısha jańa maýsymdaǵy alǵashqy júldelerine qol jetkizdi. Bul týraly egemen.kz habarlady. Oıynǵa Elbasy Nursultan Nazarbaev arnaıy kelip, fýtboldy qalyń jankúıermen birge tamashalady. «Astana Arenada» ótken kezdesý almatylyqtardyń ótkir shabýylymen bastaldy. Nebári 5-mınýtta Nenad Erıch qorǵaǵan qaqpaǵa oqsha atylǵan Jerar Goýdy «Astananyń» qorǵaýshylary der kezinde toqtatty. Artynsha Baýyrjan Islamhan qaýipti aıyp soqqysyn oryndap, qarsylastarynyń júıkesine taǵy bir márte shı júgirtti. Degenmen, ýaqyt óte kele alańǵa boı úıretken astanalyqtar oıyn órnegin ózgertip, qatarynan birneshe shabýyl uıymdastyrdy. Qos tarap ta qansha shabýyldaǵanymen negizgi 90 mınýtta esep ashylmady. Sondaı-aq, jankúıerler 15 mınýttan turatyn qosymsha eki kezeńde de gol kóre almady. Nátıjesinde, jeńimpaz oıyn sońyndaǵy penaltı arqyly anyqtalyp, «Astananyń» mereıi ústem boldy. Bul synda qaqpashylardyń sheberlikterine oń baǵa bergen jón. Sebebi, «Astananyń» qaqpashysy Nenad Erıch úsh birdeı penaltıdi qaıtarsa, qarsy komandadaǵy áriptesi Vladımır Plotnıkov bir márte sheberligimen kózge tústi. Aıta keter jaıt, oıynǵa shvesııalyq qazy Ionas Erıksson tórelik etti. Brazılııada ótken sońǵy álem chempıonatynda qazylyq jasaǵan maman Astanadaǵy oıynda óte joǵary deńgeıde qyzmet kórsetti. Ony 120 mınýttan turǵan teke-tireste nebári eki sary qaǵazdyń tirkelgeninen baıqaýǵa bolady. Ekeýi de astanalyq fýtbolshylardyń enshisine jazyldy. Naqty aıtsaq, Marın Anıchıch (87-mınýt) pen Ulan Qonysbaev (111-mınýt) eskertý aldy. Saıys sońynda jeńimpaz komandanyń kapıtany Tańat Nóserbaevqa Elbasy sýperkýbokty tabys etti. Degenmen, Tańat oıynǵa qatyspaǵanyn aıta keteıik. Onyń ornyna komandany alańǵa Abzal Beısebekov bastap shyqty. Osylaısha qazaq fýtbolynyń kezekti maýsymy shymyldyq túrdi. Endi 7 naýryz kúni fýtboldan Qazaqstan premer-lıgasynyń alǵashqy týry ótedi. Qazaqstan sýperkýbogy 1995 jyldan beri oınatylyp keledi. Bir ǵana oıynnan turatyn saıystyń alǵashqy jeńimpazdary semeılik «Elim-aı» komandasy. Maýsymashar oıyn sanalatyn tartysqa el chempıony men Qazaqstan kýbogynyń ıegeri qatysatyny belgili. О́tken maýsymda «Astana» premer-lıgada top jarsa, «Qaırat» kýbok jolyndaǵy jarysta jeńimpaz atandy. Sýperkýbok saıysynda eń kóp jeńiske jetken «Aqtóbe» komandasy (2008, 2010, 2014 jj.). Al «Astana» osymen ekinshi ret jeńis toıyn toılaýda. Osyǵan deıin elordalyq komanda 2011 jylǵy maýsymdy jeńispen bastaǵan bolatyn. Elaman Qońyr. Derek: egemen.kz. Sýret: kff.kz.