«Barys» ekinshi oıynda «Avangardtan» ese qaıtardy

ASTANA. 1 naýryz. «Barys» Qurlyqtyq hokkeı lıgasynyń pleı-off kezeńinde ombylyq «Avangardty» 2:0 esebimen jeńip, qos komanda arasyndaǵy jalpy esepti 1:1-jetkizdi. Bul týraly egemen.kz habarlady. Alǵashqy kezdesýdegi jeńilisten sabaq shyǵara bilgen astanalyqtar bul joly júıeli oıyn órnegin kórsetti. Esesine, aıdyn ıeleriniń júıkesi syr berip, tartystyń nebári úshinshi mınýtynda bir oıynshylary kishi aıyppen jazalandy. Tipti «Avangard» sapyndaǵy nemis hokkeıshisi Felıks Shıýts ımek taıaǵymen qarsylasyn urǵany úshin 4-mınýtta oıyn sońyna deıin aıdynnan qýyldy. Nátıjesinde, oıynshy basymdyǵyn utymdy paıdalanǵan qonaqtar esep ashty. Alǵashqy shaıbanyń avtory Dmıtrıı Ýpper. Úziliske deıin bizdiń komanda ekinshi shaıbany soǵyp, esepti eseledi. 15-mınýtta Talǵat Jaılaýov uıymdastyrǵan shabýylǵa nátıjeli núkte qoıǵan Fedor Polıshýk bolatyn. Oıynnyń qalǵan eki kezeńinde esep ózgermeı, «Barys» mańyzdy jeńiske qol jetkizdi. Astanalyqtardyń qaqpashysy Iаn Laso 60 mınýttyń ishinde 37 soqqyny qaıtaryp, qaqpasyn goldan aman saqtap qaldy. О́z kezeginde, «Barys» hokkeıshileri qarsylastarynyń qaqpasyna barlyǵy 16 soqqy jasaǵanyn aıta keteıik. Endi elordalyq komanda ombylyqtardy 3-4 naýryzda óz aıdynynda qabyldaıdy. «Astanadaǵy eki kezdesýde qandaı nátıje tirkelse de qos komanda arasyndaǵy tartystyń besinshi oıyny ótetin boldy. Sebebi, pleı-off kezeńiniń kelesi satysyna tórt ret jeńiske jetken komanda shyǵatyny belgili. Sondyqtan bul kezeńde qarsylastar kem degende tórt, eń kóbi jeti oıyn ótkizýge májbúr. Elaman Qońyr. Derek: egemen.kz. Sýret: hawk.ru