Qujat Memleket basshysy Qasym-Jomart Toqaevtyń «Jasandy ıntellekt dáýirindegi Qazaqstan: ózekti máseleler jáne ony túbegeıli sıfrlyq ózgerister arqyly sheshý» atty Qazaqstan halqyna Joldaýynda aıtylǵan tapsyrmalaryn júzege asyrý aıasynda Úkimet qaýlysymen bekitildi. Atalǵan Joldaýda Torǵaı óńirin keshendi áleýmettik-ekonomıkalyq turǵydan damytý qajettigi belgilengen.
Úsh jyldyq jospar 10 negizgi baǵyttaǵy 51 is-sharany qamtıdy. Olar: ónerkásip pen kólik, týrızm men sport, agroónerkásiptik keshen, bilim, densaýlyq saqtaý, áleýmettik qorǵaý, jylý jáne elektrmen jabdyqtaý, sý burý, azamattyq qaýipsizdik.
Is-sharalar óndiristik áleýetti damytýǵa, ınjenerlik ári áleýmettik ınfraqurylymdy jańǵyrtýǵa, halyqtyń ómir súrý sapasyn jaqsartýǵa, sondaı-aq ınvestısııa tartý men jańa jumys oryndaryn ashý úshin jaǵdaı jasaýǵa baǵyttalǵan.
Josparda agroónerkásiptik keshendi, onyń ishinde mal sharýashylyǵyn damytýǵa, ınfraqurylymdyq jobalardy iske asyrýǵa, sondaı-aq kásipkerlik pen ınvestısııalyq belsendilikti qoldaýǵa erekshe nazar aýdaryldy. Atap aıtqanda, Arqalyq qalasynda birqatar iri ınvestısııalyq jobalardy iske asyrý kózdelip otyr. Olardyń ishinde 6 myń bas iri qara malǵa modýldik reprodýktor qurý, jelatın men bıoaktıvti súıek matrısasyn shyǵaratyn zaýyt salý, 10 myń bas qoıǵa arnalǵan mal sharýashylyǵy keshenin, 6 myń basqa arnalǵan bordaqylaý alańyn salý. Budan bólek, qurama jem zaýytyn paıdalanýǵa berý, qýattylyǵy jylyna 300 mln jumyrtqa shyǵaratyn qus fabrıkasyn keńeıtý men jańǵyrtý josparlanyp otyr.
Qostanaı oblysynyń ákimi Qumar Aqsaqalov bıylǵa jalpy somasy 78,4 mlrd teńgege 33 is-sharany iske asyrý kózdelgenin habarlady. Qazir is júzinde 39,2 mlrd teńge bólindi.
«Biz barlyǵyn josparly merzimde iske asyrý úshin qajettiniń bárin jasaımyz. Osy jyly oblystyq bıýdjetten 8,8 mlrd teńge bólindi. Bul negizgi jobalardy tolyq kólemde qarjylandyrýǵa múmkindik berdi. Olardyń eń bastysy — Arqalyq áýejaıynyń qurylysy. Búginde qarjylandyrý arqyly áýeaılaq ınfraqurylymyn qaıta jańartý, jolaýshylar termınalyn salý jáne qajetti jabdyqtardy satyp alý tolyq qamtamasyz etildi. Jumys qatań túrde kestege saı júrgizilip jatyr. Bıylǵy tamyzda nysan paıdalanýǵa beriledi. Áýejaıdy iske qosý áýe qatynasyn qalpyna keltirip qana qoımaı, kólik qatynasy, ınvestısııalyq tartymdylyqty aıtarlyqtaı arttyryp, óńirdi damytýdyń jańa kezeńin ashady», dedi Q.Aqsaqalov.
Sonymen qatar Arqalyqta abattandyrý jumysy júrgizilip, bos turǵan ǵımarattar qalpyna keltirilip jatyr. Aýlaishilik aýmaqtar men vokzal mańyndaǵy alańdar jóndelip jatyr. Qalada ýnıversıtet ǵımaratyn qaıta jańǵyrtý jumysy aıaqtaldy. Sondaı-aq Jezqazǵan – Arqalyq avtojolyn jóndeý jumysy sońǵy kezeńge ótti.
«Arkalyk QUS» JShS qus fabrıkasynyń teń quryltaıshysy Maksım Bojko kásiporyndy eki satyly jańǵyrtý jobasyn tanystyrdy. Bul óndiris kólemin eki esege – jylyna 150 mıllıonnan 300 mıllıon jumyrtqaǵa deıin ulǵaıtýǵa jol ashady.
«Bıyl biz 70 mln jumyrtqaǵa arnalǵan jańa qus qoralaryn paıdalanýǵa berýdi, ózimizdiń qurama jem zaýytyn salýdy josparlap otyrmyz. Kelesi jyly taǵy 80 mln dana qus úıi iske qosylady. Eki kezeńdi júzege asyrý qorytyndysynda qus fabrıkasynyń qýaty jylyna 300 mln jumyrtqaǵa jetedi. Qazir bizde shamamen 250–270 adam jumys isteıdi. Shtatty 370 qyzmetkerge deıin kóbeıte otyryp, 100-den astam qosymsha jumys ornyn qurýǵa múmkindik bar», dedi kásipker.
Keńes qorytyndysynda vıse-premer Serik Jumanǵarın memlekettik organdarǵa oblys ákimdigimen birlesip qarajatty ýaqtyly ıgerý máselesin qatań baqylaýda ustaýdy jáne ınvestorlarǵa josparlanǵan jobalardy naqty iske qosý úshin barlyq qajetti qoldaý kórsetýdi tapsyrdy.
