Innovasııalyq shtab Premer-mınıstrdiń tapsyrmasymen quryldy. Onyń negizgi mindeti – ınnovasııalyq qyzmet salasyndaǵy vedomstvoaralyq úılestirýdi qamtamasyz etý men eldiń tehnologııalyq basymdyqtaryn aıqyndaý.
Otyrysta elimizde ınnovasııalardy damytýdyń tujyrymdamalyq máseleleri qaraldy. Atap aıtqanda, memlekettik qoldaý quraldaryn jetildirý, óńirlik ınnovasııalyq júıelerdi damytý, kadrlyq áleýetti kúsheıtýge baǵyttalǵan sharalar talqylandy.
Bul jumys nátıjesinde ınnovasııalyq belsendilikti arttyrýǵa, eldiń Jahandyq ınnovasııalar ındeksindegi ornyn nyǵaıtýǵa, jańa salalardy damytýǵa, joǵary tehnologııalyq jumys oryndaryn qurýǵa jáne qosylǵan quny joǵary ónim eksportyn ulǵaıtýǵa múmkindik beretin basqarylatyn ınnovasııalyq júıe qalyptastyrý kózdelip otyr.
Jańa modeldiń negizgi ıdeologııalyq ózegi – «Innovasııany ǵylym arqyly damytý» tásilinen «Ǵylymdy ınnovasııa arqyly damytý» qaǵıdatyna kóshý. Onyń máni – daıyn ozyq tehnologııalardy ıgerip, el jaǵdaıyna beıimdeý ári osy negizde otandyq ǵylymdy damytý. Iаǵnı memleket úderistiń ózine emes, naqty nátıjege qarjy baǵyttaıdy.
Jıyn qorytyndysynda Innovasııalardy damytý tujyrymdamasynyń negizgi tásilderi maquldanyp, memlekettik organdarǵa, ákimdikterge, bıznes-sektor ókilderine qujat jobasyna naqty usynystar engizý jóninde tıisti tapsyrmalar berildi.
Sonymen qatar barlyq óńirde múddeli taraptardyń qatysýymen ǵylymı-tehnologııalyq sessııalar ótkizý kestesin bekitý tapsyryldy. Bul sessııalar bıznestiń naqty tehnologııalyq suranystaryn aıqyndaýǵa baǵyttalmaq.
