Kitap oqýdy keńinen dáripteýdi kózdegen kezdesýdi kolledj basshysy Myrzabek Kújimov júrgizdi.
Kezdesý barysynda Qoıshyǵara Salǵarauly bala kúninen kitapty kóp oqyp, sonyń arqasynda jazý ónerine beıim bolǵanyn aıtty. Keıingi jazǵan kitaptaryndaǵy buryn aıtylmaǵan tarıhı jańalyqtar týraly baıandady.
– Men jýrnalıspin, – dep bastady sózin qalamger. – Tarıhshy bolamyn dep eshqashan oılaǵan emespin. Biraq keıin halqymyzdyń tarıhy týraly biraz dúnıeni oqyp, oǵan kóp qııanat jasalǵanyn kórdim. Shynynda, tarıhymyz otarlaýshy elderdiń yǵynda jazyldy. Sonyń saldarynan kóp burmalanǵan, – dedi ol.
Sonymen qatar Qoıshyǵara Salǵarauly jastarǵa jazýshy, ǵalym Aqseleý Seıdimbekpen dostyǵy jaıynda da áńgimeledi.
«Meni Aqseleýmen taǵdyrdyń ózi tabystyrdy. Ekeýmiz qazirgi «Egemen Qazaqstan» gazetinde birge istedik. Bir úıde turdyq. Syrlas dos boldyq. Birde Aqseleý: «Qoısheke, ekeýmiz Almatyǵa jazýshy bolamyz dep keldik. Jurt qatarly eki-úsh jınaǵymyz jaryq kórdi. Ádebıet – tórt qubylasy túgel elge estetıkalyq tárbıe berýge taptyrmaıtyn qural. Al biz sekildi bodan bolǵan eldiń urpaǵyn tárbıeleýge tanymdyq dúnıe qajet. Ekeýmiz de kórkem shyǵarma jazyp júrmiz. Biraq bizdiń jazǵanymyz jaýhar emes ekenin bilemiz. Al ortaqol jazýshyǵa qazaq kende emes. Sondyqtan halyqqa paıdamyzdy tıgizetin jumys isteıik», dedi. Bul oı meni de qajap júretin. Onyń aıtqanymen birden kelistim. Sóıtip, Aqseleý «Kúńgir-kúńgir kúmbezderdi» jazdy. Men «Altyn tamyrdy» jazdym. Ekeýmizdi de osy eńbekterimiz elge tanytty», dedi ol.
