Atalǵan saltanatty jıynnyń ashylý rásimine oblys ákimi Berik Ýálı, Kólik vıse-mınıstri Jánibek Taıjanov, «Qazaqstan temir joly» UK» AQ qurylys jónindegi basqarýshy dırektory Marat Isqalıev qatysty.
«Aýyl stansasyndaǵy temirjol beketi sońǵy ret 2011 jyly kúrdeli jóndeýden ótken. Stansa arqyly halyqaralyq baǵyttaǵy «Novosıbırsk – Almaty» poıyzy qatynaıdy. Al Belaǵashtaǵy temirjol beketi 1914 jyly boı kótergen. Ǵımaratqa sońǵy ret 2013 jyly kúrdeli jóndeý júrgizilgen», deıdi oblystyq baspasóz qyzmeti.
Qaıta jańǵyrtý barysynda Aýyl stansasyndaǵy temirjol beketi ǵımaratynyń aýmaǵy 240,9 sharshy metrden 272,89 sharshy metrge, Belaǵash temirjol beketi aýmaǵy 208 sharshy metrden 264,55 sharshy metrge deıin keńeıtildi. Eki nysanda da shatyr tolyq aýys-tyrylyp, ishki jáne syrtqy árleý jumysy júrgizildi. Perrondar qaıta jóndelip, irgeles aýmaqtar abattandyryldy. Vokzaldar jańa jıhazdarmen jáne qajetti jabdyqtarmen qamtamasyz etildi. Sondaı-aq múgedektigi bar azamattarǵa, qart adamdar men kishkentaı balalary bar analarǵa qolaıly jaǵdaı jasaýǵa erekshe kóńil bólindi. Ǵımarattarda arnaıy sanıtarlyq toraptar, ana men bala bólmeleri, pandýstar men taktıldi baǵyttaýshy elementter qarastyrylǵan.
О́ńir basshysy qaıta jańǵyrtylǵan vokzaldardyń eldi meken turǵyndary úshin mańyzy zor ekenin jetkizdi.
«Abaı oblysynda 10 temirjol vokzalyn rekonstrýksııalaý qolǵa alyndy. Búgin mine, eki birdeı temirjol vokzaly qaıta jańǵyrtylyp, el ıgiligine berildi. Jarma, Úshbıik, Aqtoǵaı, Degeleń, Jalańashkól, Shar vokzaldaryn qyrkúıek aıyna deıin kestege saı aıaqtaýdy josparlap otyrmyz. Semeı men Aıagóz qalasyndaǵy vokzaldar jyldyń sońynda deıin paıdalanýǵa beriledi. Jańartylǵan vokzaldar aýyl turǵyndary men óńir qonaqtaryna sapaly qyzmet kórsetip, halyq ıgiligine aınalady dep senemin», dedi B.Ýálı.
Abaı oblysy,
Borodýlıha aýdany
