Jalpy trade-in tek avtokólikpen shektelmeıdi. Bul tásil arqyly turǵyndar eski smartfonyn, turmystyq tehnıkasyn, tipti páterin ótkizip, jańa múlikke qol jetkize alady. Alaıda mundaı qolaılylyqtyń da óz quny bar. Máselen, eski múlik naryq baǵasynan tómen baǵalanýy múmkin. Endeshe trade-in júıesi kimge tıimdi – ýaqytyn baǵalaıtyn tutynýshyǵa ma, álde qosymsha tabys tabatyn kompanııaǵa ma?
Ipoteka sarapshysy Qambar Farhatulynyń aıtýyna qaraǵanda, jyljymaıtyn múlik naryǵyndaǵy trade-in ázirge jappaı qoldanysqa engen joq, alaıda oǵan qyzyǵýshylyq jyl saıyn ósip keledi.
«Bul tásil qurylys kompanııalary arasynda báseke joǵary, neǵurlym mámile kóp jasalatyn Astana men Almaty qalalarynda belsendi qoldanylady. Qazirdiń ózinde iri kompanııalardyń ózi klıentterge áýrege túspeı-aq eski páterin jańaǵa aýystyrý múmkindigin usynyp jatyr. Menińshe, naryq birtindep turǵyn úı satyp alý úderisin jeńildetý jaǵyna kóship jatyr. Trade-in – osyndaı sheshimniń biri», deıdi sarapshy.
Avtosarapshy Artýr Mıskarıan da avtokólik naryǵyndaǵy trade-in mámileler sany birte-birte ósip kele jatqanyn aıtady. Degenmen, áli de bolsa bul segmenttiń damý áleýeti keńirek. Onyń sózinshe, trade-in úlesi avtokóliktiń brendi men tutynýshynyń qandaı da bir markaǵa degen adaldyǵyna baılanysty.
«Bul tásildiń tıimdi tusy – júrilgen kólikti jańaǵa aýystyrý jyldamdyǵy, eski kólikti satý kezindegi mámileniń qaýipsizdigi, sondaı-aq bárinen buryn jańa avtokólik alýdyń biregeı sharttary», deıdi ol.
Al saýda jáne ınvestısııa sarapshysy, «TradeReport» Telegram-arnasynyń avtory Ernar Seriktiń sózinshe, elimizde atalǵan naryq belsendi qalyptasý satysynda tur. Eger damyǵan elderde trade-in júıesi avtokólik, elektronıka, turǵyn úı naryǵynyń ajyramas bóligine aınalǵan bolsa, elimizde ol áli de aktıvterdi tıimdi aıyrbastaýdyń derbes quraly retinde emes, qosymsha servıs retinde qarastyrylady.
Kollajdy jasaǵan – Qonysbaı ShEJIMBAI, «EQ»
«Bizde keleshegi zor ári qazirdiń ózinde eń damyǵan segment – avtokólik naryǵy. Bul jerde trade-in yńǵaıly naryq tetigi retinde shynymen jumys isteıdi. О́zim byltyr qyrkúıek aıynda kóligimdi trade-in arqyly ótkizip, birneshe saǵat ishinde mámileniń aıtarlyqtaı bóligin rásimdedim. Al bir kúnniń ishinde jańa avtokólikti alyp shyqtym. Iаǵnı bul – aktıvti óz betinshe uzaq ýaqyt satpaı-aq, ony jedel jańartýdyń yńǵaıly joly», deıdi sarapshy.
Onyń aıtýynsha, smartfon, turmystyq tehnıka, úı taýarlary segmentinde jaǵdaı sál ózgeshe. Munda trade-in kóbine klassıkalyq aıyrbas quraly emes, eski taýardy ótkizip, jańasyna jeńildik alý baǵdarlamasy retinde jumys isteıdi. Máselen, keıbir kompanııalar eski tehnıkany qabyldap, jańa ónimge 50–70 paıyzǵa deıin jeńildik usynady. Sondyqtan bul júıe eski aktıvtiń naryqtyq qunyn baǵalaýdan góri tutynýdy yntalandyrý men qaıta óńdeýge kóbirek baǵyttalǵan.
«Jalpy, elimizde trade-in uǵymy ártúrli formatty qamtıdy: eski aktıvti satyp alý, onyń qunyn jańasyna esepke alý nemese jeńildik usyný. Naryq damyp kele jatqanymen, bul júıe ázirge tolyq qalyptasqan joq», deıdi Ernar Serik.
Sarapshynyń aıtýynsha, trade-in kóbine múlkin joǵary baǵada satýdan góri, ýaqytyn únemdeýdi qalaıtyn adamdarǵa tıimdi.
«О́ıtkeni óz betińmen satqanda jarnama berý, satyp alýshylarmen kezdesý, saýdalasý, qujat rásimdeýge biraz ýaqyt pen kúsh jumsaýǵa týra keledi. Al trade-in arqyly múlikti sál arzanyraq ótkizgenimen, esesine ýaqytty únemdep, mámileni jyldam ári qaýipsiz aıaqtaýǵa bolady», deıdi E.Serik.
Ásirese balaly otbasylarǵa bul óte qolaıly. Sebebi báriniń birdeı aptalap satyp alýshy izdep júrýge múmkindigi bola bermeıdi. Mundaı jaǵdaıda baǵadaǵy azdaǵan aıyrmashylyq mámileniń tez, túsinikti ári artyq áýre-sarsańsyz júzege asýymen óteledi.
Aqshadan da qymbat resýrstardy saqtaýǵa kómektesetin tásildiń suraq týdyratyn tusy da joq emes. Sonyń biri – satýshy kompanııanyń eski múlikti qandaı baǵamen qabyldaıtyny. Ipoteka sarapshysy Qambar Farhatulynyń aıtýynsha, bul jerde trade-in arqyly turǵyn úıdi qabyldaıtyn kompanııanyń belgili bir táýekelderdi óz moınyna alatynyn túsiný mańyzdy. Sondyqtan múlik ádette naryqtaǵy qunynan tómen baǵalanady. Al qanshalyq az bolatyny úıdiń ótimdiligine, jaǵdaıy men ornalasqan jerine baılanysty.
«Eger páter ıesi asyǵys bolmasa ári barynsha joǵary baǵaǵa satqysy kelse, óz betinshe satý – bárinen utymdy. Al negizgi maqsat turǵyn úı máselesin sheship, jańa úı satyp alý bolsa, onda trade-in shynymen oń sheshim bolady. Tańdaý adamnyń óz qolynda. Aldymen birneshe nusqany salystyryp, barynsha paıdaly nemese ýaqytty únemdeýdiń qaısysy ózi úshin mańyzdy ekenin túsinýi kerek», deıdi Q.Farhatuly.
Al avtosarapshy Artýr Mıskarıannyń pikirinshe, jańa avtokólikter naryǵynda bastapqy baǵa segmentindegi usynystar kóbeıgen saıyn, júrilgen kólikti óz betinshe satý qıyndaı túsedi ári uzaqqa sozylýy múmkin.
«Klıent mámileniń jyldam ári yńǵaıly júzege asýynan bólek, satý úderisiniń qaýipsizdigine de ıe bolady. Al kólikti erkin naryqta satqandaǵy yqtımal baǵa aıyrmasy jańa avtokólikke usynylatyn jeńildikter men tıimdi sharttar esebinen óteledi», deıdi sarapshy.
Onyń aıtýynsha, avtosalondar ádette eski kólikti ıesinen alǵan soń, kásibı mamandar arqyly qaıta satady. Buǵan qosa, avtosalondardyń turaqty klıenttik bazasy bar ári kólikti keń aýdıtorııaǵa usyný múmkindigi de mol.
«Bıznes-model turǵysynan alǵanda, trade-in – naryqtaǵy úlesti arttyrýdyń tıimdi quraldarynyń biri. Sebebi keıingi jyldary resmı dılerler úshin júrilgen avtokólikter segmentindegi paıda marjasy birtindep tómendep keledi», deıdi A.Mıskarıan.
Sarapshy Ernar Serik tutynýshy úshin negizgi táýekel baǵalaý úderisiniń ashyq bolmaýy ekenin aıtady.
«Adam óziniń kóligi, smartfony nemese turmystyq tehnıkasy nege dál solaı baǵalanǵanyn túsinbeýi múmkin. Avtokólikterden aıyrmashylyǵy, «Samsung» kompanııasynyń eski telefondardy baǵalaý júıesi barynsha tehnologııalyq sheshimge negizdelgen. Paıdalanýshy qurylǵynyń birneshe fotosyn júkteıdi. Al jasandy ıntellekt kómegimen júıe onyń tehnıkalyq jaǵdaıyn avtomatty túrde baǵalap, aldyn ala qunyn usynady. Sondyqtan trade-in qyzmetinde baǵalaý erejeleriniń túsinikti ári ashyq bolǵany mańyzdy. Atap aıtqanda, dıagnostıka nátıjesi kórsetilip, baǵanyń ne sebepti tómendetilgeni túsindirilýi qajet. Sondaı-aq naryqtaǵy baǵamen salystyrý múmkindigi berilip, tutynýshyǵa qosymsha sharttardyń kúshtep tańylmaýy mańyzdy», deıdi E.Serik.
Onyń pikirinshe, trade-in ekinshi naryqty retke keltirýge kómektesedi. Sonyń arqasynda tekserilgen, dıagnostıkadan ótken taýarlar kóbeıedi. Bul, ásirese, jasyryn aqaýlar qaýpi kóbirek avtokólik, elektronıka saýdasynda mańyzdy. Sonymen qatar bul júıe eski zatty qoqys emes, belgili bir quny bar aktıv retinde qarastyrýǵa úıretedi.
«Bizge trade-in-di jaı ǵana «eskini tapsyryp, jeńildik al» aksııasy retinde emes, aktıvterdi qaıta paıdalanýdyń tolyqqandy mádenıeti retinde damytqan jón. Túptep kelgende mundaı júıe bárine tıimdi bolýy kerek: tutynýshy qolaılylyq pen jeńildikke qol jetkizedi, bızneske jańa klıentter men qaıta satylymǵa ıe bolady, al ekonomıkada taýarlar men resýrstar barynsha utymdy paıdalanylady», deıdi sarapshy.
Sarapshylardyń paıymdaýynsha, trade-in júıesiniń eldegi damý áleýeti joǵary. Tutynýshylar ýaqytty únemdeý, mámileniń qaýipsizdigi men qolaılylyǵyna kóbirek mán bergen saıyn, bul quralǵa suranys arta túspek. Qazirdiń ózinde avtonaryqta tıimdiligin dáleldegen tásil aldaǵy ýaqytta turǵyn úı sektorynda da keńinen qoldanylyp, iri qalalardaǵy naryqtyń mańyzdy segmentteriniń birine aınalýy yqtımal.
