Aqtóbedegi «Megadan» mına izdeldi

AQTО́BE. 30 naýryz. Aqtóbede «102» telefonyna belgisiz bireýler qońyraý shalyp: «Mega» oıyn-saýyq ortalyǵyna jarylǵysh zat qoıyldy», – dep habarlady. Abyroı bolǵanda, aqpar jalǵan bolyp shyqty. Jalǵan habar taratqan adamdy tártip saqshylary bir saǵatta quryqtady. Bul týraly Aqtóbe oblystyq ishki ister departamentiniń baspasóz qyzmeti habarlady. 29 naýryz kúni túngi mezgilde jedel basqarý ortalyǵynyń «102» telefonyna belgisiz bireý habarlasyp, «Mega-Aqtóbe» oıyn-saýyq ortalyǵyna jarylǵysh zat qoıylǵandyǵy týraly habarlaǵan. Osy habardy alǵannan keıin oqıǵa ornyna tez arada ishki ister departamentiniń jedel tergeý toby, «Arlan» arnaıy maqsattaǵy bólimshesiniń saperlary, Ulttyq Qaýipsizdik Komıtetiniń qyzmetkerleri jáne tótenshe jaǵdaılar departamentiniń kezekshi jasaǵy jiberildi. Arnaıy qyzmetter men quqyq qorǵaý organdary kelgenshe oıyn-saýyq ortalyǵyndaǵy barlyq adam kaýipsiz jerge shyǵaryldy. Osydan keıin «Arlan» arnaıy maqsattaǵy bólimshesiniń saperlary qyzmettik-izdestirý ıtterin jáne qajetti quraldardy qoldaný arqyly ǵımarattyń ishin jáne oǵan jaqyn aýmaqtarǵa tekserý júrgizip, eshqandaı jarylǵysh zatty tappady. Jedel basqarý ortalyǵy men jedel qyzmetterdiń birlesken áreketteriniń arqasynda sol túni osy qylmysty jasady degen kúdikpen 29 jastaǵy qala turǵyny qolǵa tústi. Tergeý barysynda kúdikti jarylǵysh zat qoıylǵandyǵy týraly aqparatty buzaqylyq nıetpen habarlaǵanyn moıyndady. Qazir oıyn-saýyq ortalyǵyna jáne memleketke keltirilgen shyǵyn kólemi anyqtalýda. Búginde kúdikti ýaqytsha ustaý qamaǵyna qamaldy. Oǵan qatysty QR QK 273-baby boıynsha qylmystyq is qozǵaldy. Atalǵan baptyń sanksııasynda 6 jylǵa deıin bas bostandyǵynan aıyrý jazasy qarastyrylǵan. Bul jyl basynan beri jarylǵysh zat qoıylǵandyǵy týraly ekinshi derek. О́tken jyly mundaı jaǵdaı 4 márte qaıtalansa, 2013 jyly oblys boıynsha 13 derek tirkelgen. Satybaldy Sáýirbaı. Derek: Aqtóbe oblystyq ishki ister departamentiniń baspasóz qyzmeti. Sýret: remarka.kz.