Depýtat Almas Turtaev Qyzylorda kásipkerlerimen kezdesti

ASTANA. 30 maýsym. Qyzylorda qalasynda Parlament Májilisiniń depýtaty Almas Turtaev kásipkerlerdiń quqyǵyn qorǵaý keńesiniń otyrysyna qatysty. Onda depýtat aımaqtaǵy kásipkerlik salasynyń jaı-kúıimen tanysty. Bul týraly oblystyq kásipkerler palatasynyń baspasóz qyzmeti habarlady. Jyl basynan beri kásipkerlerdiń quqyǵyn qorǵaý keńesiniń 6 otyrysy ótkizildi. Keńes otyrysynda qaralǵan 18 másele boıynsha 16 kásipkerdiń quqyǵy qorǵalǵan. Kezekti keńes otyrysynda kásipkerler palatasy dırektorynyń orynbasary Darhan Myrzalıev: «О́ńirdegi qadaǵalaýshy organ ókilderi men Memlekettik qyzmet isteri jáne sybaılas jemqorlyqqa qarsy is-qımyl agenttiginiń birige jumys jasaý nátıjesi boıynsha 7 laýazymdy tulǵa tártiptik sharaǵa qoldanyldy. Osy jerde aıta keteıin, kásipkerlerdiń máselesin qarastyrýda jergilikti atqarýshy organdarǵa suranys hattar joldanady. Alaıda, bul hattar qalalyq jer qatynastary, sáýlet jáne qala qurylysy bólimderi tarapynan jıi jaýapsyz qalyp otyrady. Osynyń saldarynan kásipkerlik sýbektileriniń ótinishterin qaraý merzimi saqtalmaı, kásip ıeleri biraz ábigerge túsedi», – dedi. Bul máselege qatysty keńes tóraǵasy Almas Turtaev: «Kásipkerler – ózin ǵana emes, basqa da azamattardy jumyspen qamtı otyryp, el qazynasyna qarjy quıyp, sol arqyly memlekettik qyzmetkerlerdiń jalaqy alýyna jaǵdaı jasap otyrǵan qoǵamnyń belsendi toby. Sondyqtan kásipkerliktiń damýyna kedergi keltiretin ákimshilik kedergilerdi boldyrmaý úshin jergilikti atqarýshy organdardyń jumystaryna ishki baqylaýdy kúsheıtý qajettiligi týraly qala ákimdigine usynys joldaýdy tapsyram», – dep sózin túıindedi. Aıta keteıik, aldaǵy ýaqytta bul sharadan da nátıje shyqpasa, kásipkerliktiń damýyna kedergi keltirip otyrǵan tıisti qyzmetkerlerdiń aty atalyp, túsi tústelip, qoǵam nazaryna usynylatyn bolady. Talǵat Raıymbek. Derek, sýret: Qyzylorda oblystyq kásipkerler palatasynyń baspasóz qyzmeti.